Այսօր ԱԺ նիստում քննարկվեց «Անվտանգության խորհրդի կազմավորման եւ գործունեության մասին» օրենքը:
Արդարադատության նախարարի առաջին տեղակալ Արթուր Հովհաննիսյանն ասաց, որ անվտանգության խորհրդի գլուխն է լինելու ՀՀ վարչապետը, խորհրդի կազմում են լինելու առաջին փոխվարչապետը, երկու փոխվարչապետները, անվտանգության խորհրդի քարտուղարը, պաշտպանության նախարարը, արտաքին գործերի նախարարը, ազգային անվտանգության ծառայության պետը, ոստիկանության պետը, զինված ուժերի գլխավոր շտաբի պետը: Ազգային խորհրդի գործունեությունն իրականացվում է կոլեգիալ հիմունքներով՝ նիստերի միջոցով: Ազգային խորհրդի՝ պաշտպանության ոլորտի քաղաքականության հիմնական ուղղություններին վերաբերող հարցերով որոշումներն ընդունվում են Ազգային խորհրդի առնվազն 7 անդամների ձայներով, խորհրդատվական բնույթի որոշումների համար բավական կլինի խորհրդի անդամների ձայների մեծամասնությունը:
Էդմոն Մարուքյանը հարցրեց. «Մեր Սահմանադրությունը չի նախատեսում առաջին փոխվարչապետի պաշտոն, նշվում է, որ կառավարությունը կազմված է լինում վարչապետից, 3 փոխվարչապետից, նախարարներից: Եթե մենք սա չուղղենք, կունենանք ի սկզբանե հակասահմանադրական օրենք: Կարող է մոռացել եք այն ժամանակ նշել առաջին փոխվարչապետ, հիմա չեք կարող նման պաշտոն ունենալ»:
Արթուր Հովհաննիսյանն ասաց, որ Սահմանադրությունը արգելք չունի: Կառավարության կառուցվածքն էլ օրենքով հետո է սահմանվելու: Այդ օրենքում էլ կգրեն, որ կա առաջին փոխվարչապետ եւ երկու փոխվարչապետ:
ԱԺ փոխնախագահ Միքայել Մելքումյանը հարցրեց, թե ինչու ԱԺ նախագահը կամ նախագահը ներառված չեն խորհրդում: Արթուր Հովհաննիսյանը պատասխանեց, որ Անվտանգության խորհուրդը գործադիրի մաս է, այդ մարմնում պետք է ներառել պետական կառավարման համակարգի ներկայացուցիչներ: Պաշտպանության քաղաքականության իրականացման համար է, իսկ քաղաքականության որոշման լիազորությունը բացարձակապես կառավարությանն է տրված, դրանով է պայմանավորված այս կազմը: Ինչու չունենք գլխավոր դատախազին, որովհետեւ անկախ մարմին է:
ՀՀԿ պատգամավոր Խոսրով Հարությունյանն ասաց, որ խորհրդի կազմում չի կարող լինել ԱԺ նախագահը, նախագահը, բայց պետք է նախատեսել, որ նրանք կարող են մասնակցել նիստին:
Փոխնախարարը պատասխանեց, որ նախատեսել են, որ անվտանգության խորհուրդը կարող է հրավիրել ԱԺ նախագահին, նախագահին, բայց դա խորհրդի ցանկությամբ պետք է լինի, ոչ թե ԱԺ նախագահի կամ նախագահի:
Խոսրով Հարությունյանը նաեւ հարցրեց՝ եթե ՊՆ նախարարը դեմ է, բայց պաշտպանության հիմնական ուղղության հարց է քննարկվում, ո՞նց կարող են որոշումն ընդունել, արդյո՞ք այդ փաստաթուղթն իրավական ուժ կարող է ունենալ: Հովհաննիսյանը պատասխանեց, որ կառավարությունը, որը պաշտպանության քաղաքականությունը որոշողն է, քվեարկությամբ է որոշումները կայացնում, անվտանգության խորհրդում դոմինանտ ձայն չկա, եթե 7 անդամ կողմ է, այդ որոշումն ընդունվելու է: Պաշտպանության քաղաքականության որոշողը ոչ թե ՊՆ նախարարն է, այլ կառավարությունն է:
Հռիփսիմե ՋԵԲԵՋՅԱՆ
