«Էռնեկյանը դնում է նախապայման՝ օդանավակայանի շենքը պետք է քանդել». Մկրտիչ Մինասյան

Օդանավակայանի հին մասնաշենքի համահեղինակ Արթուր Թարխանյանի դուստր, ճարտարապետ Անահիտ Թարխանյանը վիրավորված ՝ որևէ անգամ ոչ մեկը չի արձագանքել ճարտարագետների առաջարկներին:

«Մեդիա կենտրոնում» «Զվարթնոց» օդանավակայանի հին շենքի ճակատագիրը. գնահատական նոր նախագծին» թեմայով հրավիրված քննարկմանը տիկին Թարխանյանը հայտնեց, թե բազմաթիվ անգամ դիմել են կառավարությանը, սակայն ոչ մի արձագանք: Նա հիշեցրեց, որ «Զվարթնոց» օդանավակայանի հին շենքը տրված է կատարման կոնցեսիոն հիմունքներով, որի հիմնական իմաստն է բարելավել օդանավակայանի պայմանները: Մինչդեռ ըստ տիկին Թարխանյանի՝ դրա փոխարեն տեսնում ենք լքված մի շենք, որտեղ ներդրում չի արվել երկար տարիներ, և փոխարենը քանդելու հարց է բարձրանում:

Տիկին Թարխանյանը, խոսելով օդանավակայանի հին շենքի ճարտարապետական արժեքի մասին, նշեց. «Այդ շենքը դիտարկվում է որպես համաշխարհային լավագույն օբյեկտներից մեկը, որը ներկայացնում է 50-ականների մոդերնիզմը, ճարտարապետությունը: Ուստի նման բարբարոսությունն այդ շենքի հանդեպ դժվար է ընկալել»:

«Հայնախագիծ» ինստիտուտի տնօրեն, Հանրային խորհրդի քաղաքաշինության ենթահանձնաժողովի նախագահ Գրիգոր Ազիզյանն էլ հիշեցրեց՝ կոնցեսիոն կառավարումը ենթադրում է այն, որ 30 տարի հետո շենքը պետք է հանձնել բարելավված վիճակում: Դառնալով շենքի ուժեղացմանը՝ պարոն Ազիզյանն ասաց. «Շենքը շատ բարձր կրողունակություն ունի. առաջին հարկի սյուների փոքրիկ ուժեղացումով լուծվում է շենքի ուժեղացման խնդիրը: Ուստի ծախսերը պետք է կատարվեն հարդարման աշխատանքների համար»:

Հայաստանի Ճարտարապետների միության նախագահ Մկրտիչ Մինասյանը վրդովված է Էռնեկյանի կողմից ճարտարապետության հանդեպ արհամարհական վերաբերմունքից: Պարոն Մինասյանը հիշեցրեց նաև, որ ի պատասխան՝ ՀՀ կառավարությունը նրան շնորհեց ազգային հերոսի կոչում: Մկրտիչ Մինասյանը մտահոգություն հայտնեց՝ քանդում են օդանավակայանը, երիտասարդական պալատը, Ծածկած շուկան, «Սևա»ն հյուրանոցը. շենքեր, որոնք Երևանի դիմագիծն էին:

Դառնալով Էռնեկյանի հետ համագործակցության բացակայության խնդրին՝ պարոն Մինասյանը պատմեց. «Էռնեկյանին անընդհատ խնդրում ենք, որ նրա ճարտարապետական արվեստանոցը մեր մասնագետների հետ մի ընդհանուր կոնսենսուսի գա: Բայց նրանք ամեն անգամ գալիս ու առաջին հերթին դնում են նախապայման, թե պետք է քանդել»:

Մկրտիչ Մինասյանը վստահեցրեց՝ օդանավակայանի շենքը պատրաստի բրենդ է Երևանի համար, փոխանակ պահպանենք, մեր ձեռքով մեր արմատները քանդում ենք: Ըստ ճարտարապետի՝ շատ դեպքերում նման երևույթներն են արտագաղթի պատճառ դառնում: Պարոն Մինասյանը մտահոգվեց՝ նույնն  էլ կատարվում է «Ռոսիա» կինոթատրոնի հետ. հեղինակը ողջ է, մինչդեռ անգամ նրա հետ չեն խորհրդակցել:

Անահիտ Թարխանյանն էլ տեղեկացրեց, որ իրենք ներկայացրել են օդանավակայանի այլընտրանքային նախագծեր, սակայն դեռ պատասխան չեն ստացել: Տիկին Թարխանյանը նաև հիշեցրեց՝ օդանավակայանը ՀՀ-ի համար ունի անվտանգության գործառույթ, այն շրջափակման մեջ գտնվող Հայաստանի համար միակ կապն է արտաքին աշխարհի հետ. «Մեր օդանավակայանն ուներ 14 կառամատույց, մինչդեռ Էռնեկյանն ու իր թիմն առաջարկում են 6 գործող կառամատույցներին ավելացնել ևս 6-7-ը: Այսինքն՝ ձևավորել մի օդանավակայան, որը զիջում է եղածին»:

Տիկին Թարխանյանը մտավախություն ունի, որ Էռնեկյանն ու իր թիմը նպատակ ունեն բիզնես ծրագիր իրականացնել՝ իրենց բիզնեսը «ռելոկացիա» անել, ուստի քանի որ ՀՀ-ում կա երկու օդանավակայան, մեկը պետք է քանդել, որպեսզի մյուսի գինը բարձրանա, և Էռնեկյանը կարողանա այն բարձր գնով վաճառել:

Տաթև ՀԱՐՈՒԹՅՈՒՆՅԱՆ