Ադրբեջանի նախագահ Իլհամ Ալիեւի կողմից երկրի նախագահական ընտրությունները հոկտեմբերից ապրիլ տեղափոխելու որոշման պատճառներից մեկն ընդդիմությանը համախմբելու հնարավորությունից զրկելն է: Այս մասին այսօր «Արմենպրես»-ի մամուլի սրահում լրագրողների հետ հանդիպմանն ասաց արեւելագետ, իրանագետ Վարդան Ոսկանյանը: Նա նշեց՝ Ադրբեջանի ընդդիմության կողմից արդեն իսկ եղել են հայտարարություններ, որ չեն մասնակցելու ընտրություններին. «Ադրբեջանի քաղաքական ընդդիմությունը բավականին տարանջատված է, եւ, ըստ էության, լուրջ ուժ չի ներկայացնում, որը կկարողանար մարտահրավեր նետել եւ լայն դաշինքով մասնակցեր ընտրություններին: Բայց դաշինք կազմելու հնարավորություն էլ այլեւս չկա»:
Վարդան Ոսկանյանի բնորոշմամբ՝ Ալիեւը, քաղաքական ընդդիմությանը հեռացնելով ասպարեզից՝ դաշտ է թողել կրոնական ընդդիմության համար. «Այժմ Ադրբեջանում ամենահզոր ընդդիմությունը կրոնական՝ շիայական խմբերն են, որոնք հովանավորվում են Իրանից»:
Արտահերթ ընտրությունների անցկացման մյուս պատճառն, ըստ Վարդան Ոսկանյանի, գուցե կապ ունի այն փաստի հետ, որ Հայաստանն ապրիլին անցնելու է նոր՝ խորհրդարանական կառավարման ռեժիմին. «Գուցե Ալիեւը վերլուծել է ու գտել, որ այդ պահին անցկացնելն ավելի նպատակահարմար կլինի: Մյուս ենթադրությունը, որը պակաս հավանական է, այն է, որ Ալիեւն ազդակ է ստացել մեկ այլ՝ երրորդ ուժային կենտրոնից»:
Մանրամասն՝ տեսանյութում:
Լուիզա ՍՈՒՔԻԱՍՅԱՆ
