«Թշնամանքը գյուղում հասել է մի տեղ, որ նույնիսկ աշակերտներն են միմյանց հետ վիճում, թե ով պետք է լինի տնօրեն». Լոքյան

Տավուշի մարզի սահմանամերձ Վերին Կարմիրաղբյուր գյուղում միջնակարգ դպրոցի տնօրենի թափուր պաշտոնի համար մրցույթ էր հայտարարվել դեկտեմբերի 8-ին եւ երկու թեկնածուները հավաքել են հավասար թվով 4 ձայն: Մարզպետը դիմել է կառավարությանը, որ փոխվարչապետը կայացնի համապատասխան որոշում եւ 10-օրյա ժամկետում նշանակվի տնօրեն: Փոխվարչապետն արդեն որոշումը կայացրել է, բայց մարզպետարանը չի իրագործում այն, մինչ օրս դպրոցը տնօրեն չունի: «Ելք» խմբակցության պատգամավոր Գեւորգ Գորգիսյանն այսօր ԱԺ-կառավարություն հարցուպատասխանի ժամանակ այդ հարցը բարձրացրեց՝ նշելով, որ հիմա գյուղում եւ դպրոցում թեժ իրավիճակ է:

Տարածքային կառավարման եւ զարգացման նախարար Դավիթ Լոքյանը պատասխանեց, որ խնդրին տեղյակ են. «Փոխվարչապետի կողմից հանձնարարական է ներկայացվել տնօրենի պաշտոնում նշանակել մի քանի ամիս առաջ այդ պաշտոնում պաշտոնակատար դարձած ինֆորմատիկայի ուսուցչուհուն: Գյուղում նրա դեմ լուրջ ընդվզման գործընթաց էր սկսվել, խնդիրը բավականին բարդացել էր: Նախարարության վարչության պետը եղել է գյուղում, զրուցել բոլոր կողմերի հետ՝ նախկին տնօրեն, ուսուցիչներ, երեխաներ: Թշնամանքը գյուղում հասել է մի տեղ, որ նույնիսկ աշակերտներն են միմյանց հետ վիճում, թե ով պետք է լինի տնօրեն»:

Լոքյանն ասաց, որ ուսումնասիրության արդյունքները ներկայացվել են Վաչե Գաբրիելյանին եւ նա չեղյալ է համարել իր նախկին որոշումը, ժամանակավոր լուծում են առաջարկել, մինչեւ գյուղում կրքերը կհանդարտվեն:

Նախարարն ասաց, որ եկել են եզրակացության, որ գյուղում հարմար են տեսնում, որ երկու թեկնածուներից որեւէ մեկը այսօր չղեկավարի դպրոցը եւ հենց այդպես էլ անելու են, նոր պաշտոնակատար կնշանակվի եւ կլինեն նոր ընտրություններ:

Հռիփսիմե ՋԵԲԵՋՅԱՆ