Այսօր ԱԺ-կառավարություն հարցուպատասխանի ժամանակ «Ելք» խմբակցության պատգամավոր Էդմոն Մարուքյանը վարչապետ Կարեն Կարապետյանին հարցրեց՝ դուք կոչ էիք արել սփյուռքին ներդրումներ անել Հայաստանում, այդ կոչին ինչքանո՞վ է սփյուռքն արձագանքել: Կարեն Կարապետյանը պատասխանեց, որ իրոք, ինքը նման կոչ արել է, իսկ թե ինչքանով է արձագանքել սփյուռքը կամ չի արձագանքել, վիճակագրությունը կներկայացնեն այս ամսվա ընթացքում. «Փետրվարին բոլոր նախարարությունները տալու են հաշվետվություն, իսկ այն թվերը, որը ես եմ հայտարարել՝ 830-840 մլն ներդրումային ծրագրեր, այս պահին ամփոփված ունենք եւ բոլոր ծրագրերը, որոնք մենք հայտարարել էինք՝ 856 մլն, եթե հիշողությունս չի դավաճանում, իրագործվել է, որից 580 մլն-ը մասնավոր սեկտորից է: Ցուցակը մոտ օրերս կլինի, կարող եք ուսումնասիրել»:
Վարչապետն ասաց, որ բացի իր նշած 856 մլն-ից, 196 մլրդ էլ ներդրումներ են արել մարզերում:
Մարուքյանը նաեւ հետաքրքրվեց՝ հիմնական ներդրումները, որոնք սպասում էինք, ՌԴ-ից են գալու, բայց կապված ԱՄՆ պատժամիջոցների հետ ի՞նչ վտանգ է տեսնում: Վարչապետը պատասխանեց, որ բոլոր ներդրումները ՌԴ-ից չեն. «Աշխարհագրությունը կտանք: Հունվար ամսի հետ համեմատենք 2016-ի, արտահանումը աճել է 43.3 տոկոս, որից 19 տոկոսը ԵԱՏՄ է, 51 տոկոսը՝ այլ երկրներ»:
Կարեն Կարապետյանն ասաց, որ ներդրումային ծրագրերը բազմաթիվ են՝ ջերմոցներ, սառնարաններ, վերամշակող ձեռնարկություններ:
Հռիփսիմե ՋԵԲԵՋՅԱՆ
