2012 թվականից փետրվարի 7-ը համարվում է համացանցում հայատառ գրելու օր: Նախաձեռնության հեղինակ Զոհրապ Եգանյանն այսօր «Նոյյան Տապան» լրատվական գործակալության մամուլի սրահում ասաց, որ 6 տարի է անցել, եւ թեպետ տեխնիկական առումով շատ բաներ են փոխվել, այսօր շատ ավելի բարվոք է վիճակը, բայց շատերը դեռեւս նախընտրում են գրել լատինատառ. «Եթե այսօր մարդ հայատառ չգրելու պատճառ բերում է տեխնիկական խնդիրները, ապա ես այդ փաստարկին թերահավատորեն կմոտենամ»:
Զոհրապ Եգանյանը նշեց, որ ամեն ինչ կանի, որ պետական գերատեսչությունները այս հարցով լուրջ զբաղվեն, քանի որ կարիք կա մասնագիտական քննարկումների:
«Մենք լուրջ խնդիր ունենք մեր ապագա սերունդներին մեսրոպատառ հայերենը փոխանցելու հարցում: Մենք այն սերնդից ենք, որ գրել սովորել ենք գրիչով, իսկ այժմ այնպիսի սերունդ է գալիս, որոնք այդ ամենը «թաչ» էկրաններով է իր գրագրությունները վարում, եկող սերունդը օգտագործում է ոչ մեսրոպատառ հայերենը»,-հավելեց բանախոսը:
Այն հարցին, որ շատերը, հատկապես պատանեկան տարիքի օգտատերերը վախենում են լատինատառից անցնել հայատառի նրա համար, որ սխալներ չանեն, Զոհրապ Եգանյանը պատասխանեց, որ ինքն էլ է սխալ թույլ տալիս, ինչպես նաեւ շատ շատերը, բայց դա հիմք չէ հրաժարվելու հայատառից:
«Ինտերնետ հանրություն» ՀԿ փոխնախագահ Գրիգորի Սաղյանն էլ նշեց, որ մարդիկ հայատառ դոմենային անունն էլ չեն ընկալում ինտերնետին միանալու մի հնարավորություն, որը միայն մեզ մոտ չէ. «Շատ երկրներ կան, որ լատինատառն է հոգեբանորեն որպես ստանդարտ ընկալվում»:
Անուշ ՄԱԹԵՎՈՍՅԱՆ
