Այսօր ԱԺ-ում քվեարկության դրվեցին երեկ քննարկված օրենքները, այդ թվում՝ «Դատական օրենսգրքի» նախագիծը, որը սահմանադրական օրենք է:
Մինչ քվեարկությունը «Ծառուկյան» խմբակցության պատգամավոր Վահե Էնֆիաջյանն ասաց, որ այս նախագծի հետ կապված իրենց խմբակցության տարբեր անդամներ տարբեր դիրքորոշումներ են ունեցել, բայց առաջինից երկրորդ ընթերցման ժամանակ նախագծում փոփոխությունները դրական են համարում, ուստի իրենք որոշել են քվեարկել ազատ:
«Ելք» խմբակցության պատգամավոր Արտակ Զեյնալյանը հայտարարեց, որ իրենց խմբակցությունը դեմ է քվեարկելու, քանի որ այս օրենքով դատավորների ներքին անկախությունն ապահովված չէ, դատավորն իր արդարադատական գործառույթի համար պատասխանատվության ենթարկվել չի կարող եւ դատական ակտը ստուգման առարկա կարող է դառնալ բացառությամբ վերաքննության կարգով: Եթե տեղի է ունեցել կոնվենցիայի խախտում, եվրոպական դատարանը հայտնաբերել է խախտում, ապա պատասխանատվության պետք է ենթարկվեն բոլոր դատավորները՝ առաջին ատյանից մինչեւ Վճռաբեկ դատարան: Այդ դեպքում պետք է պատասխանատվության ենթարկվի նաեւ արդարադատության նախարարը, որը կազմակերպել է ՄԻԵԴ-ում այդ ակտերի պաշտպանությունը, ինչպես նաեւ Եվրոպական դատարանում ՀՀ ներկայացուցիչը»:
Նա ասաց, որ միջազգային փաստաթղթերում այլ կարգավորում է:
«Ելք» խմբակցության պատգամավոր Էդմոն Մարուքյանն էլ ասաց, որ այս օրենսգրքից փաստաբաններին 100 հազար դրամով տուգանքը դեռ մնացել է, խոստացան, որ այն կհանեն, բայց չեն հանում, տեղափոխում են Դատավարական օրենսգիրք՝ մի շարք խախտումներով:
Նա ասաց, որ «Դատական օրենսգրքում» դրական կողմեր կան, բայց ԱԺ Պետաիրավական հանձնաժողովում իրենք տասնյակ առաջարկներ են արել, որոնք մերժվել են. «Այսինքն, սահմանադրական օրենքն ընդունում են առանց կոնսենսուսի, առանց ընդդիմության հետ քննարկելու եւ սրանք ապագայում լուրջ պրոբլեմ են առաջացնելու»:
Նախագիծն ընդունվեց 72 կողմ, 12 դեմ, 10 ձեռնպահ ձայներով:
Հռիփսիմե ՋԵԲԵՋՅԱՆ
