Բենզինի, դիզելային վառելիքի, սեղմված գազի այս տարեսկզբից տեղի ունեցած գնաճը իրարանցում եւ անհանգստություն ստեղծեց հանրության շրջանում: Պաշտոնյաները հայտարարում էին՝ գնաճը կառավարելի է եւ, նույնիսկ տրամաբանական, քանի որ դրանք պայմանավորված էին հարկային նոր օրենսգրքով: Նշված ապրանքախմբերի վերաբերյալ գնաճի տարբեր թվեր էին հնչում: Երեկ Ազգային վիճակագրական ծառայությունը հրապարակել է գնաճի ցուցանիշները, այդ թվում նաեւ ոչ պարենային ապրանքների գնաճը:
Մասնավորապես բենզինի, դիզելային վառելիքի եւ սեղմված գազի գնաճի վերաբերյալ ԱՎԾ-ն հրապարակել է՝ 2018 թվականի հունվարին նախորդ տարվա դեկտեմբերի համեմատ բենզինի գներն աճել են 5.4%-ով: Դիզելային վառելիքը թանկացել է 16.3%-ով, իսկ, ինչպես ԱՎԾ-ն է նշել՝ փոխադրամիջոցների լիցքավորման համար գազի գներն աճել են 11.8%-ով: Բենզինի գնաճը այս տարվա հունվարին նախորդ տարվա հունվարի համեմատ կազմել է 28.7%, դիզելային վառելիքինը՝ 37.3% , իսկ սեղմված գազինը՝ 10.9%:
Նելլի ԲԱԲԱՅԱՆ
