ԱԺ-ում այսօր կառավարությունը քննարկման ներկայացրեց 2017-ի մայիսին Կազանում ստորագրված մի համաձայնագիր՝ ԵՏՄ անդամ պետությունների կողմից արդյունաբերական ապրանքների նկատմամբ հատուկ սուբսիդիաների տրամադրման հետ կապված քննություն անցկացնելու կարգի մասին:
Երկրներն իրավունք չունեն կիրառել հակադեմպինգային միջոցառումներ, ԵՏՄ անդամ երկրների տարածքներում գործող սուբսիդիաները համաձայնագրով կկարգավորվեն:
ԱԺ փոխնախագահ Միքայել Մելքումյանը Տնտեսական զարգացման եւ ներդրումների փոխնախարար Հովհաննես Ազիզյանին հարցրեց, թե ի՞նչ ընթացակարգով պետք է ձեռնարկատերերը դիմեն, որ սուբսիդիա ստանան: Փոխնախարարը պատասխանեց, որ սուբսիդավորումը տրամադրվում է անդամ պետությունների կողմից. «Այժմ ունենք ԵՏՄ շրջանակներում 13 տեխնիկական պլատֆորմներ, որտեղ քննարկվում են համատեղ արտադրությունների ծրագրեր: Եթե արդեն կա համատեղ մշակված ծրագիր եւ ԵՏՄ համատեղ արտադրանք, կարող են այդ դեպքում տրամադրել համապատասխան սուբսիդիաներ: Պետություններն իրենք են որոշում թե ինչպես պետք է այդ սուբսիդիան տրամադրեն»:
Մելքումյանը ճշտեց՝ սուբսիդավորումը ԵՏՄ-ի ֆոնդի հաշվի՞ն է լինելու, թե՞ ամեն պետության երկրի բյուջեի հաշվին: Փոխնախարարը պատասխանեց, որ պետական բյուջեից հատկացվող սուբսիդիաների մասին է խոսքը, ընդհանուր ձեւավորված ֆոնդ գոյություն չունի:
Ավելի ուշ իր ելույթում Մելքումյանը մի հարց ուղղեց՝ երբ մտնում էինք ԵՏՄ, ներկրումների կենտրոնացված, կամ օլիգոպոլ բնույթը պիտի որ լուծվեր: ՌԴ-ի նման խոշոր պետությունը նույն շաքարավազը պետք է բերեր 20-30 անգամ ավելի, ու եթե ավելի էին բերում, ուրեմն գներն էլ պետք է էժան լիներ, որովհետեւ մեծ խմբաքանակով են առնում. «Բա դրա մի փոքր պարտիան ինչի՞ Հայաստան չեն բերում: Երրորդ երկրից ենք բերում, ո՞նց եղավ, որ էժան ապրանքը չենք բերում: Մի պարտիա էլ թող գա Հայաստան, կարծես պիտի դա ձեռնտու լիներ՝ հաշվի առնելով գինն ու ճանապարհածախսը: Այսինքն, ինչ-որ բարիերներ կա՞ն, որ Ռուսաստան բերված ապրանքի մի փոքր մասը Հայաստան չի գալիս, բերեք, թող էժանություն լինի: Մաքսային սահմանը չկա, ի՞նչ է խնդիրը, որ չի գալիս»:
Փոխնախարար Ազիզյանն էլ պատասխանեց, որ այս տարի արդեն սկսել են նաեւ ՌԴ-ից ներմուծել. 2017-ին շաքարի հումք եւ շաքար ներմուծվել է 80 հազար տոննա, 17 հազար տոննա սպիտակ շաքար ներմուծվել է հենց ՌԴ-ից, նախկին տարիներին չի եղել դա:
Նշենք, որ շաքարավազի շուկայում գերիշխող դիրք ունի ՀՀԿ պատգամավոր Սամվել Ալեքսանյանին պատկանող ընկերությունը:
Հռիփսիմե ՋԵԲԵՋՅԱՆ
