Այսօր «Ոչ թանկացումներին» երթի ժամանակ «Ելք» խմբակցության ղեկավար Նիկոլ Փաշինյանը հայտարարեց, որ իրենք վաղվանից ստորագրահավաք են սկսում՝ արտահերթ նիստ հրավիրելու եւ Հարկային օրենսգրքում փոփոխություններ կատարելու համար:
Նա ասաց, որ փոփոխություններ կլինեն միայն հանրային ճնշման դեպքում:
Փաշինյան ասաց, որ սպասում էին, որ կառավարությունն ինքը կձեռնարկի փոփոխությունները, բայց քանի որ չեն անում, արտահերթ նիստով կփորձեն դա անել իրենք:
Երթի ընթացքում Մաշտոցի պողոտայում երթը կանգնեցրեցին ոստիկաններ, ցուցարարները պահանջում էին՝ «ճա-նա-պարհ»: Փաշինյանն ասաց, որ իրազեկել են պատկան մարմիններին եւ դա ընդունվել է ի գիտություն. «Մաշտոցի պողոտան մերն ա»:
Փաշինյանը բարձրախոսով դիմեց ոստիկաններին՝ ասելով, որ այս թանկացումները վերաբերում են նաեւ իրենց ընտանիքներին, որովհետեւ նրանք նույնպես ամենօրյա ռեժիմով առեւտուր են անում խանութներից եւ զգում են թանկացման արդյունքը. «Նաեւ ձեր աշխատավարձերը չեն բարձրացել այս տարի եւ սա եւս մեկ անգամ ցույց է տալիս, որ ՀՀ բոլոր խավերը այս թանկացումների արդյունքում շարունակելու են ոչ թե նույն ձեւ, այլ շատ ավելի վատ ապրել, որովհետեւ թանկացումները ծավալվում են եւ ազդում են բոլոր խավերի եւ ոլորտների վրա: Մեր երթը պաշտպանում է նաեւ ձեր եւ ձեր ընտանիքների շահերը, որովհետեւ մենք այս երթով բոլոր թանկացումներին ասում ենք ոչ»:
Ոստիկանները հորդորեցին, որ ցուցարարները ոստիկանական շղթան չանցնեն եւ հակառակ երթեւեկելի գոտի դուրս չգան:
Հռիփսիմե ՋԵԲԵՋՅԱՆ
