Հարցեր ՀՀ չորրորդ նախագահի թեկնածուին
Հայաստանի Հանրապետական կուսակցության գործադիր մարմինը հունվարի 18-ին որոշեց նախագահի թեկնածու առաջադրել Միացյալ Թագավորությունում Հայաստանի դեսպան Արմեն Սարգսյանին: Վերջինս հանդիպեց ՀՀ նախագահ Սերժ Սարգսյանին եւ ասաց, որ որոշում ընդունելուց առաջ կհանդիպի քաղաքական տարբեր ուժերի, գիտնականների, մտավորականների, սփյուռքի հայերի եւ այլ շերտերի ներկայացուցիչների հետ: Հանդիպումները շարունակվում են: Եթե Արմեն Սարգսյանը այդ հավաքներում պատասխաններ է տալիս, ապա նրա պահվածքից հարցեր են առաջանում:
Կարեւոր մի հանգամանք կա. Արմեն Սարգսյանը ՀՀԿ-ի աջակցությամբ է նախագահ դառնալու: ՀՀԿ-ն ավելի քան 20 տարի է՝ ղեկավարում է Հայաստանը: Այնպես է ղեկավարում, որ արտագաղթը չի դադարում, կոռուպցիան չի նվազում, փողոցում օրը ցերեկով մարդ սպանելը դառնում է սովորական, օլիգարխ եւ պաշտոնյա չեն տարբերում: Հարց առաջին. այս հենքով նախագահը կարո՞ղ է դրական տեղաշարժ ապահովել, տրորել իրեն նախագահ դարձրած կուսակցության ոտքը:
Իր կիսանախընտրական, կիսաքարոզչական հանդիպումներում Արմեն Սարգսյանն ասաց այն, ինչի մասին լռում է 20 տարի. 1998թ. Հայաստանից հեռացել է առողջական խնդիրների պատճառով, այն ժամանակվա պաշտպանության նախարար Վազգեն Սարգսյանի հետ կոնֆլիկտ չի ունեցել: Այս պնդումը հաստատեցին նրա մտերիմները, Վազգեն Սարգսյանի եղբայրները` Արամ Սարգսյանը, Արմեն Սարգսյանը, փաստաթղթեր հրապարակեցին: Հարց երկրորդ. ինչո՞ւ է Արմեն Սարգսյանը 20 տարի լռել, ինչո՞ւ 20 տարի նա այսօրվա համառությամբ չի պատասխանել Վազգեն Սարգսյանի դեմ զրպարտությանը: Արմեն Սարգսյանը 20 տարի հրաժարվել է հարցազրույցներից: Մերժվածների ցուցակում ինքս էլ կամ:
Երեւանում այս կամ այն վայրում հանդիպում կազմակերպելը առանձնապես մեծ ծախսեր չի ենթադրում: Բայց դրսի հայ համայնքների հետ հանդիպումները ծախսատար են: Եթե Արմեն Սարգսյանը դեռ չի որոշել՝ նախագահ դառնա՞լ, թե՞ ոչ, ինչո՞ւ է նման ծախսեր անում: Անում է որ ի՞նչ անի:
ՆԵԼԼԻ ԳՐԻԳՈՐՅԱՆ
«Առավոտ»
03.02.2018
