Ֆրանսիայի նախագահ Էմանուել Մակրոնի հայտարարությունից հետո Թուրքիայում ակտիվորեն շահարկվում է Հայոց ցեղասպանության հարցը: Այս մասին այսօր «Պոստ Սկրիպտում» մամուլի ակումբում նշեց թուրքագետ Մուշեղ Խուդավերդյանը: Նա հիշեցրեց՝ Մակրոնը հայտարարեց՝ Ֆրանսիան ոչ միայն խորհրդարան կվերադարձնի Հայոց ցեղասպանության ժխտումը քրեականացնող օրինագիծը, այլեւ օրացույցում կսահմանի Հայոց ցեղասպանության հիշատակման օր:
«Այսինքն, Հայոց ցեղասպանությունը Ֆրանսիայում պաշտոնապես կնշվի: Սրան արձագանքեց Թուրքիայի արտգործնախարար Մեւլութ Չավուշօղլուն, ասելով, որ նման հարցերը իրենց չեն հետաքրքրում, քանի որ իրենք հոգնել են եվրոպական երկրների պնդումներից: Ըստ Չավուշօղլուի՝ երբ Թուրքիան չի կատարում իր պարտավորություններից մեկը, եվրոպական երկրները շահարկում են Հայոց ցեղասպանության հարցը»,-փաստեց Մուշեղ Խուդավերդյանը:
Անդրադառնալով Պոլսի հայոց պատրիարքարանի՝ օրերս արված հայտարարությանը, որով պատրիարքարանը հաջողություն է մաղթում Թուրքիային՝ Աֆրինում ռազմական գործողությունների առնչությամբ, թուրքագետը նշեց. «Պատրիարքարանը ստիպված էր նման հայտարարություն անել: Կրոնական կառույցներին, եւ ոչ միայն, ուղղակի ստիպում են անել իշխանամետ հայտարարություններ: Պատրիարքարանը փորձում է այնպես անել, որ հնարավորինս կոնֆլիկտներ չունենա Թուրքիայի հետ»:
Մուշեղ Խուդավերդյանը հավելեց, որ Աֆրինի հարցում հայկական կողմը որեւէ շահ չունի, իսկ պատրիարքարանի հայտարարությանը կարելի է ըմբռնումով մոտենալ:
Լուիզա ՍՈՒՔԻԱՍՅԱՆ
