Երևանի վարչական դատարանն այսօր սկսեց «Հանրային տեղեկատվություն և գիտելիքի կարիք» հ/կ-ի («Փինք Արմենիա») հայցի քննությունն ընդդեմ Երևանի քաղաքապետարանի: Կազմակերպությունը քաղաքապետարանի դեմ հայց է ներկայացրել` 2017թ մայիսի 27-ին Երևանի կենտրոնից ԼԳԲՏ (լեսբի, գեյ, բիսեքսուալ, տրանսգենդեր) անձանց հանդեպ հանդուրժողականության թեմայով սոցիալական գովազդները հեռացնելու գործողությունները ոչ իրավաչափ ճանաչելու համար:
«Փինք Արմենիա»-ի շահերի ներկայացուցիչ, փաստաբան Հասմիկ Պետրոսյանը դատարանին տեղեկացրեց, որ նշյալ հայցով պահանջում են նաեւ քաղաքապետարանին պարտավորեցնել վերականգնել ապամոնտաժված պաստառները:
«Մտահոգություն ենք հայտնում առ այն, որ քաղաքապետարանի գործողությունները պայմանավորված են եղել պաստառների հենց բովանդակությամբ: Ունենք ապացույցներ, որ քաղաքապետարանը միջոցներ է ձեռնարկում եւ ձեռնարկել, որպեսզի նման պաստառներ Երեւանի փողոցներում այլեւս չհայտնվեն: Դա փաստելու համար մենք ունենք վկաներ եւ նամակագրություններ»
Փաստաբանի խոսքով՝ խնդիրը պաստառների բովանդակությունն է եղել, ոչ թե հ/կ-ի կողմից օրենքի պահանջի չկատարումը:
Լուիզա ՍՈՒՔԻԱՍՅԱՆ
Լուսանկարը՝ «Փինք Արմենիա»-ի
