ԱԺ նախկին պատգամավոր Հակոբ Հակոբյանի դիտարկմամբ, մեր պետությունը ոչ թե օգնում, այլ վնասում է գյուղացուն:
«Ասում ենք, դու աշխատիր, որ պարտք ունենաս ու վատ ապրես, բայց գոյությունդ կպաշտպանես, գոյություն պաշտպանելով՝ գյուղատնտեսություն չի զարգանա: Գոյություն պաշտպանելով՝ մարդ կարող է պարզապես ապրել, բայց մարդը պետք է հողակտորը մեծացնի, ջերմոցներ կառուցի, մարդիկ գումար չունեն, ովքեր էլ գումար են վերցրել, խնդիրների տակ են ընկել»,- այսօր «Հայելի» ակումբում գյուղացիների շահերն էր պաշտպանում նախկին պատգամավորը:
Ըստ նրա՝ պետությունը պետք է քիչ միջամտի, իսկ եթե բարի է ցանկությունը. «Ավելի լավ է՝ ոռոգման ջուրը, որ մեկ դրամով տալիս են ներտնտեսային ցանցին, տասնմեկ դրամով հասցնում գյուղացուն, դրա մասին մտածեն, դա թալան է: Խոսում ենք զարգացման մասին, ինչ զարգացման մասին է խոսքը, դեռ բերքը չջրած, գալիս, ասում են՝ փողը տուր: Եթե ուզում ենք գյուղացուն օգուտ տանք, այդ հարցերին պետք է լուծում տանք»:
Նախկին պատգամավորը նկատեց, որ բանկերը շատ բարձր տոկոսներով են վարկեր տալիս, գյուղացին վերցնում, ընկնում է կրակը՝ չկարողանալով փակել. «Դատարաններում ծփում են այդ գործերը»:
Արփինե ՍԻՄՈՆՅԱՆ
