Կառավարության այսօրվա նիստում վարչապետ Կարեն Կարապետյանն ասաց, որ արգելանքի հետևանքով մաքսազերծման խոչընդոտների վերացման ուղղությամբ աշխատանքներ պետք է կատարել: Նրա խոսքով՝ իրականացված ուսումնասիրությունների արդյունքում վերհանվել են ապրանքների մաքսազերծման խափանման դեպքեր, որոնք պայմանավորված են եղել ֆիզիկական կամ իրավաբանական անձի գույքի վրա արգելանքի առկայությամբ, ինչի հետևանքով սահմանափակվում է մաքսազերծման գործընթացը և անձանց՝ ապրանքի տնօրինման հնարավորությունը: Այս խնդիրները լուծելու նպատակով վարչապետն արդարադատության նախարարին և Պետական եկամուտների կոմիտեի նախագահին հանձնարարեց 20-օրյա ժամկետում համատեղ մշակել և կառավարության աշխատակազմ ներկայացնել անձի գույքի կամ դրամական միջոցների արգելանքի առկայության դեպքում ապրանքների մաքսազերծման խոչընդոտների վերացմանն ուղղված առաջարկություններ:
«Իրականում անհասկանալի է, եթե մարդն ապրանք է ներմուծում Հայաստան և ունի իր հաշվի վրա ունի արգելանք, ինչո՞ւ ենք մենք իրեն այդ հարցով սահմանափակում: Համենայնդեպս մի հատ նայեք, այնտեղ խնդիր ունենք»,- ՊԵԿ նախագահին հանձնարարեց Կարեն Կարապետյանը:
Նելլի ԲԱԲԱՅԱՆ
