«Այն ինչ ասացիք`փաստաթղթի հիմնավորումներում պետք է գրված լիներ: Ես ուզում եմ իմանալ`ո՞վ է գրում այդ հիմնավորումները: Այսպիսի փաստաթղթեր չեն կարող խորհրդարան գալ: Օրենսդրական նախաձեռնությունների մասով նաեւ ազդեցության գնահատական պետք է ներկայացվի: Բայց շատ չեզոք, ֆորմալ ինչ-որ բան է գրվում, էսպես չի կարելի»,-այսօր ԱԺ տնտեսական հարցերի հանձնաժողովի նիստում ՀՀ տնտեսական զարգացումների եւ ներդրումների նախարարի տեղակալ Հովհաննես Ազիզյանին դիմեց հանձնաժողովի նախագահ Խոսրով Հարությունյանը:
Փոխնախարարը ներկայացնում էր «Եվրասիական տնտեսական միության անդամ պետությունների կողմից արդյունաբերական ապրանքների նկատմամբ հատուկ սուբսիդիաները Եվրասիական տնտեսական հանձնաժողովի հետ կամավոր համաձայնեցնելու եւ Եվրասիական տնտեսական միության անդամ պետությունների կողմից հատուկ սուբսիդիաների տրամադրման հետ կապված` Եվրասիական տնտեսական հանձնաժողովի կողմից քննություն անցկացնելու կարգի մասին» համաձայնագիրը վավերացնելու մասին հարցը:
Նախ բացատրել էր, որ «հատուկ սուբսիդիաները» նախատեսված են եւ հատուկ ուղղվածություն ունեն ձեռնարկությունների համար: Ասել էր, որ դա ներդրվում է, դեմփինգային հնարավորությունները բացառելու համար:
Հովհաննես Ազիզյանն ընդունեց Խոսրով Հարությունյանի դիտողությունը. «Կխմբագրենք»:
Հարցը դրական եզրակացությամբ անցավ լիագումար նիստերի օրակարգ:
Հանձնաժողովը դրական եզրակացություն տվեց նաեւ «ՏՐԱՍԵԿԱ մուլտիմոդալ փոխադրումների զարգացման մասին համաձայնագիրը վավերացնելու մասին» հարցին:
Ասվեց`այն նպաստում է Հայաստանի մրցունակության բարձրացմանը: Խոսրով Հարությունյանը համաձայն է այդ դիտարկման հետ, բայց նկատում է` հարց է թե որքանո՞վ ենք կարողանում նպաստավոր օգտագործել կամ որքանո՞վ ենք կարողանում երկրի տնտեսական զարգացման համար պայմաններ ստեղծել: Բայց միջազգային գործընթացներից Հայաստանը դուրս չպետք է թողնել, ուստի հարցին դրական եզրակացություն տրվեց:
Նելլի ԳՐԻԳՈՐՅԱՆ
