2013 թվականի Հայաստանի լավագույն մարզիկ, ազատ ոճի ըմբշամարտի 2013 թվականի աշխարհի ու Եվրոպայի չեմպիոն Դավիթ Սաֆարյանը մտադիր է վերադառնալ մեծ ըմբշամարտ:
Նա Ռիոյի օլիմպիական խաղերից հետ շուրջ երկու տարի հանդես չի գալիս մրցաշարերում, սակայն մտադիր է վերադառնալ մեծ սպորտ:
«Ռիո դե Ժանեյրոյից հետո շատ մեծ հոգնածություն էի զգում: Պրոֆեսիոնալ մակարդակում մարզիկի կյանքը հեշտ չէ՝ մշտական հավաքներ, մրցումներ, քաշի մշտական կարգավորում: Դա շատ բարդ գործընթաց է: Բացի դա, առողջության հետ կապված խնդիրներ էլ կային: Որոշեցի, որ հարկավոր է դադար վերցնել, ապաքինել վնասվածքներս:
Իհարկե, այս ընթացքում շարունակում եմ մարզավիճակ պահպանել: Անկեղծ ասած, վարժասարքերից արագ ձանձրանում եմ, իսկ երբ Կրասնոդարում մարզադահլիճ եմ մտնում, որտեղ աշխատում է մարզիչս՝ Աբդուլլա Մագոմեդովը, ընկնում եմ տարերքի մեջ:
Հիմա եկել է լիարժեք մարզումներին վերադառնալու, մեր ազգային ընտրանու կազմում ուսումնամարզական հավաքների եւ մրցումների մասնակցելու ժամանակը: Ըմբշամարտիկի կարիերաս ավարտելու մասին երբեք չեմ մտածել: Չեմ ցանկանում հետո զղջալ, որ վաղ հեռացա սպորտից: Դեռ 28 տարեկան եմ եւ ցանկանում եմ նորից բարձր մակարդակով հանդես գալ: Ժամանակ դեռ կա: Կարեւորը հոգեբանորեն պատրաստ լինելն է: Ոչ-ոք ինձ չի պարտադրում եւ մտադրությունիցս հետ կանգնելու խորհուրդ չի տալիս: Վերջնական որոշում ինքս եմ կայացնելու: Մշտական կապ եմ պահպանում Հայաստանի ըմբշամարտի ֆեդերացիայի, հատկապես՝ Արայիկ Բաղդադյանի, նախարար եւ ՀԱՕԿ գլխավոր քարտուղար Հրաչյա Ռոստոմյանի հետ:
Կիրակի օրը ներկա էի հունահռոմեական ըմբշամարտի Հայաստանի առաջնությանը: Շատ հետաքրքիր գոտեմարտեր եղան, հաճույքով հետեւում էի, չնայած ինքս ազատ ոճի ըմբիշ եմ: Զգացի, որ ուզում եմ կրկին գորգ մտնել, միանալ ազգային թիմի մարզումներին մասնակցել մրցումների: Դրա համար պետք է աշխատել եւ վերստին լավագույն մարզավիճակի հասնել: Եվրոպայի առաջնության մասին խոսելն անիրական է: Չեմ հասցնի: Բայց աշխարհի առաջնությանը մասնակցելու ցանկություն կա: Ներկա պահին 70 կգ եմ, երկու քաշային կարգերի մասին եմ մտածում՝ 65 կամ 70 կգ: Մնացածը մարզումային գործընթացը ցույց կտա: Սպորտում պետք է բարձր նպատակներ դնել եւ ձգտել հասնել դրանց: Ես հենց այնպես գորգ վերադառնալ չեմ ուզում: Դա ժամանակի անիմաստ կորուստ եւ ուժերի վատնում կլինի», – Aravot.am-ի հետ զրույցում ասաց Դավիթ Սաֆարյանը:
Աշոտ ՀԱԿՈԲՅԱՆ
