«Դա կոչվում է թշնամություն մեր հանդեպ, ուրիշ էլ ի՞նչ կարող եմ ասել»,- «Հայելի» ակումբում լրագրողների հետ հանդիպմանը, անդրադառնալով Ռուսաստանի կողմից՝ Ադրբեջանին զենք վաճառելու փաստին, հայտարարեց արցախյան պատերազմի առաջին հրամանատար, գնդապետ Արկադի Կարապետյանը (Արկո):
Ըստ նրա ՝ այդպիսով երկու պետություններն իրենց խնդիրներն են լուծում, իսկ Ռուսաստանի արածին այլ անուն չկա, քան դավաճանություն: Գնդապետը վրդովվեց. «Դավաճանություն է, թշնամություն. ինչ ուզում եք անունը դրեք, քանի որ դա ամեն ինչին համապատասխանում է: Ինչ պատճառաբանություն էլ բերեն, ասեն՝ բիզնես է կամ այլ բան, միևնույն է՝ արդարացում չէ: Հասարակ մահկանացու, թե պետությունների հարաբերություններ նույնն են: Եթե քո թշնամուն զենք են վաճառում, կարող եք փողոցում էլ հարցնել, մարդիկ շատ ավելի ուրիշ բառերով կբնութագրեն»:
Պարոն Կարապետյանն օրինակ բերեց, թե Ռուսաստանի արածը Հայաստանի հանդեպ նույնն է, ինչ մի մարդու թշնամուն տանես դանակ տաս, որ նրան սպանի:
Հիշելով 80-ականների իրավիճակը՝ ազատամարտիկը պատմեց՝ հայերը շատ լավ հասկանում էին, որ արյուն է հեղվելու. «Սպասելի էր, որ թուրքերը մեզ կրակելու, սպանելու են: Բայց մենք հավատում էինք, որ մեր պայքարն արդար է և պետք է հաղթենք: Ես տրիբունայից ասում էի՝ ժողովուրդ, այս պայքարը ոչ մեկ, հինգ, ոչ գուցե հիսուն տարվա պայքար չէ: Շարժումն ինքնաբերաբար տեղի չունեցավ, պատահական ոչինչ տեղի չունեցավ, մենք ընդհատակում լավ կազմակերպվել էինք, տիրապետում էինք իրավիճակին: Մենք տնօրինեցինք մեր բախտը»:
Գնդապետն անկեղծացավ՝ այն ժամանակ ոնց հաշվում էինք, պարտվում էինք, շանս չկար, բայց հաղթեցինք:
Անդրադառնալով հողերը հանձնելու մասին հայտարարություններին՝ ազատամարտիկը վստահեցրեց, թե սա լոկ տարածք չէ, սա հայրենիք է. «Ո՞վ է ինձնից հարցրել՝ ես պատրա՞ստ եմ այն հանձնելու: Մենք հող չենք գրավել, մենք մեր հայրենիքն ենք ազատագրել: Որ ասում են 800 հեկտար… ես հո գյուղատնտես չե՞մ, որ հեկտարների մասին խոսեմ: Ես հայրենիքի մասին եմ խոսում»:
Տաթև ՀԱՐՈՒԹՅՈՒՆՅԱՆ
