2018թ. Facebook-ը լրահոսում ցույց կտա ավելի շատ տեղական նորություններ վստահելի աղբյուրներից: Այս մասին հայտնել է սոցցանցի հիմնադիր Մարկ Ցուկերբերգը Facebook-ի իր էջում:
«Մենք մի շարք թարմացումներ ենք պատրաստում՝ ցույց տալու ավելի բարձր որակ և վստահված նորություններ: Անցյալ շաբաթ մենք մի թարմացում արեցինք, որով ավելի շատ նորություններ են երևում հանրության մեջ լայնորեն վստահելի աղբյուրներից: Այսօր մեր հաջորդ թարմացումը ուղղված կլինի տեղական աղբյուրներից լուրեր ցույց տալուն»,- գրել է նա:
Ցուկերբերգը նշել է, որ մարդիկ ցանկանում են Facebook-ում տեսնել ավելի շատ տեղական լուրեր, քանի որ դրանք օգնում են հասկանալ այնպիսի հարցեր, որոնք ուղղակիորեն ազդեցություն ունեն կյանքի վրա: Հետազոտությունները ցույց են տալիս, որ տեղական նորություններ կարդալն ուղղակիորեն կապվում է քաղաքացիական ներգրավվածության հետ: «Երբ մարդիկ գիտեն՝ ինչ է կատարվում իրենց շրջապատում, նրանք ավելի հակված են ներգրավվել և փոփոխություններ կատարել»,- կարծում է Ցուկերբերգը:
«Այսօրվանից սկսած՝ մենք ավելի շատ նորություններ ցույց կտանք ձեր քաղաքից կամ համայնքից: Եթե դուք հետևում եք տեղի հրատարակիչներին կամ եթե ինչ որ մեկը կիսվում է տեղական նորությամբ, դա կարող է վերև բարձրանալ ձեր լրահոսում: Մենք սա առաջինը սկսում ենք ԱՄՆ-ում, և մեր նպատակն է տարվա ընթացքում դա տարածել ավելի շատ երկրներում: Տեղական նորություններն օգնում են կառուցել հասարակությունը և՛ օնլայն, և՛ օֆլայն ռեժիմով»,- գրել է Ցուկերբերգը:
Պատրաստեց՝ Վիկտորյա ԱՆԴՐԵԱՍՅԱՆԸ
