Լրագրողների հետ հանդիպմանն այսօր ՀՀ ԱԳ նախարար Էդվարդ Նալբանդյանը մեկնաբանեց պաշտոնական Բաքվի հայտարարություններն այն մասին, թե Արցախ այցելած հայտնի հասարակական-քաղաքական գործիչները ներողություն են խնդրում Ադրբեջանից եւ խնդրում իրենց հանել «սեւ ցուցակից»:
«Եթե հավատանք Բաքվի պնդումներին, թե այդ անձինք ներողություն են խնդրում, ապա այդ ցուցակը չէր ավելանա ու հասնի մոտ 600-ի»,-նկատեց Էդվարդ Նալբանդյանը: Նա հիշեցրեց հայտնի բլոգեր Ալեքսանդր Լապշինի պնդումը, որ իր հետ կատարվածից հետո Արցախ այցելողների թիվը կավելանա, ինչը եւ տեղի ունեցավ:
«Ադրբեջանական կողմի պնդումներն իրականությանը չեն համապատասխանում: Այդ ցուցակի անձանց մեծամասնությունը պատիվ է համարում այդ ցուցակում ներառված լինելը: Իսկ պնդումները, թե նրանք խնդրել են իրենց հանել ցուցակից եւ ներողություն հայցել Արցախ այցելելու համար, եւս իրականությանը չեն համապատասխանում»,-հայտարարեց Էդվարդ Նալբանդյանը:
Լուիզա ՍՈՒՔԻԱՍՅԱՆ
