Սոցիալ Դեմոկրատ Հնչակյան կուսակցության Հայաստանի կազմակերպության 11-րդ համագումարի աշխատանքներն ավարտվեցին հունվարի 28-ին:
11-րդ համագումարը Հայաստանում տեղի ունեցող ներքաղաքական զարգացումների վերաբերյալ տվեց իր գնահատականները.
Հայաստանի Հանրապետության բնակչության սոցիալապես անապահով հատվածն ունի կուսակցության գործնական աջակցության կարիքը, որը դրսևորվելու է քաղաքական բոլոր հնարավոր հարթակներում և շարունակելու է մնալ Կուսակցության գործունեության առանցքային թիրախը:
Հասարակության կարևորագույն ու առավելապես խոցելի հատվածը աշխատավոր մարդն է: Համագումարը գտավ, որ ՍԴՀԿ պետք է շարունակի իր ուշադրության կենտրոնում պահել ու գործնական քայլեր կիրառել՝ աշխատավոր մարդու իրավունքները պաշտպանելու և եղած աղաղակող խախտումներին հանրային հնչեղություն ապահովելու համար:
Օրենքի լիակատար հավասարությունը երկրում անվտանգության գլխավոր երաշխիքն է: Ուստի համագումարը կարևոր է համարում համահայկական ջանքերի գործադրումը երկրում առկա արատավոր երևույթների արմատախիլ անելու հարցում:
Արտագաղթը Հնչակյան կուսակցությունը համարում է երկրի առջև ծառացած կարևորագույն մարտահրավեր: Այն վերածվել է ազգային աղետի, որը կասեցնելու համար անհրաժեշտ է գործնական քայլեր, աշխատատեղերի ապահովում և քաղաքացիների՝ ՀՀ-ում ապրելու արժանապատիվ պայմաններ:
Համագումարը գտավ, որ Արցախի հիմնախնդիրը հայ ժողովրդի և կուսակցության համար մնում է առանցքային, սկզբունքային խնդիր: Կուսակցությունը կանգնած է Արցախի ժողովրդի ազատ կամարտահայտման կողքին և անվերապահ սատարում է Հայաստանի և Արցախի Զինված ուժերին: Խաղաղ ժամանակ հնչակյանը քաղաքացի է, պատերազմական դրության ժամանակ հայոց բանակի զինվոր:
Համագումարը գտնում է, որ երիտասարդությունը երկրի շարժիչ ուժն է, ուստի անհրաժեշտ է հստակ երիտասարդությանը նվիրված քաղաքական գծի ամրապնդում, ծրագրերի իրականացում:
Երկրի ընդերքը համաժողովրդական հարստությունն է, ուստի համագումարը ապագա վարչությանը հանձնարարում է ձևավորել ու կազմակերպել ընդերքի ճիշտ շահագործման հայեցակարգ:
Առաջիկա ներքին քաղաքական զարգացումների մասին ՍԴՀԿ Հայաստանի նորընտիր վարչությունը իր ժամանակին հանդես կգա հավելյալ հայտարարությամբ:
ՍԴՀԿ Հայաստանի կազմակերպության մամլո դիվան
