Գենետիկորեն ձեւափոխված օրգանիզմները (ԳՁՕ) ճնշում են իմունիտետը, առաջացնում ալերգիաներ, սերնդեսերունդ անցնելով էլ` առաջացնում գենային այնպիսի փոփոխություններ, որոնք մարդու առողջությանը լուրջ վնասներ են հասցնում: Այսօր «Հենարան» ակումբում այսպիսի մտահոգություն հայտնեց «Հանուն կայուն զարգացման» հ/կ նախագահ Կարինե Դանիելյանը` պատասխանելով այն պնդումներին, թե ԳՁՕ պարունակող սնունդը օրգանիզմում նորմալ մարսվում է եւ ապացուցված չէ դրա վտանգավորությունը:
Մանրամասները` տեսանյութում
Գենետիկորեն ձեւափոխված օրգանիզմների վերաբերյալ օրենքի նախագիծը կառավարությունը հետ է կանչել Ազգային ժողովից եւ նոր մշակված տարբերակը կրկին կուղարկվի ԱԺ: Ըստ Կարինե Դանիելյանի, տարիներով այս օրինագիծը քնեցվել է, քանի որ օրենքին դեմ պատգամավորները նույն ներկրողներն են, որոնք գենետիկորեն ձեւափոխված օրգանիզմներով սնունդ ու սերմեր են ներկրում:
Հիշեցնենք, որ օրեր առաջ` հունվարի 26-ին Ազգային ժողովում այս թեմայով լսումներ էին կազմակերպվել, որի ընթացքում նույնպես ընդդիմադիր կարծիքներ հնչեցին:
Aravot.am-ի հարցրեց, թե այս անգամ ինչ երաշխիք կա, որ ԳՁՕ-ների մասին օրինագիծը ԱԺ-ն կհաստատի, հաշվի առնելով, որ նույն ներկրողները շարունակում են մնալ պատգամավորներ եւ օրենքին դեմ կամ կողմ քվեարկողները հենց նրանք են: Կենսաբանական գիտությունների դոկտոր Ռուզաննա Սադոյանը, որը նույնպես ասուլիսի մասնակից էր, ի պատասխան ասաց. «Կարծես բոլորը գիտակցում են հարցի լրջությունը եւ վտանգը: Բոլորը պատրաստ են ընդունելու մի օրենք, որն, իսկապես, կկանոնակարգի այդ դաշտը»:
Ըստ տիկին Սադոյանի, գենետիկորեն ձեւափոխված սերմերի ու օրգանիզմների ազդեցությունը ոչ միայն մարդու առողջության, այլ նաեւ գյուղատնտեսական հողերի վրա է բացասական հետեւանքներ թողնում:
Կարինե Դանիելյանի խոսքով, լսումների ժամանակ նախարարությունների ներկայացուցիչները ճիշտ է վտանգները նշում էին, բայց շատ չեզոք էին խոսում. «Հատկապես ինձ զարմացնում է առողջապահության նախարարության դիրքորոշումը: Հենց նրանք պետք է լինեն նախաձեռնողը, իսկ ստացվում է, որ անընդհատ հ/կ-ները, գիտնականները հարցը բարձրացնում են, իսկ առողջապահության նախարարությունը կարծես հեռվից հետեւում է»:
Լուսինե ԲՈՒԴԱՂՅԱՆ
