«Մեր կազմակերպությունն այս տարի երեք արշավախմբեր են ֆինանսավորել, ընդ որում այդ արշավախմբերին աջակցել է նաեւ գիտության պետական կոմիտեն: Պեղումներ են կատարվել Օձաբերդում, Մեծամորում եւ Զորաց քարերում: Երեքն էլ հրաշալի նյութ են տվել»,- հունվարի 29-ին «Տեսակետ» ակումբում հայտնեց «Պատմամշակութային արգելոց-թանգարանների և պատմական միջավայրի պահպանություն» ծառայության գիտական քարտուղար Աշոտ Փիլիպոսյանը:
Գիտնականը հավելեց. «Երեքում էլ արտասահմանյան գործընկերներ ունենք, որոնք մասնակցել են պեղումներին, մասնավորապես Օձաբերդում` Ավստրալիայից, Իրանից, Ռուսաստանից, Մեծամորում հայ-լեհական արշավախումբն է աշխատում, բայց դրա հետ միասին նաեւ գերմանացիներ ու ֆրանսիացիներ, հունգարացիներ եւ բուլղարացիներ: Զորաց քարերում առայժմ մենք ենք աշխատում եւ լեհերը»:
Գիտնականը հավելեց, որ Մեծամորում անագե իրեր են գտել, միայն մեկ դամբարանում 1000-ից ավելի հուլունքներ. «Հարակից տարածքներում այնքան քիչ են նման բաները: Անագը հնում ծիսական նշանակություն է ունեցել, բայց նաեւ հարստության նշան է եղել: Անագը շատ թանկ է գնահատվել»: Նա նաեւ մի պայմանագիր վկայակոչեց անագ վաճառող հայի մասին:
Հնագետը բացառիկ փաստեր էլ մեջբերեց. «Շատ հետաքրքիր տվյալներ կան, որ հայտնաբերվել են Հյուսիսային Միջագետքում: Մասնավորապես դեռեւս 1660 թ միջին ասորերենով սալիկներ են հայտնաբերվել, որտեղ նշվում է, թե Նարիրի երկրի բնակիչները զբաղվում էին անագի վերավաճառքով»:
Գոհար ՀԱԿՈԲՅԱՆ
