Ռուսաստանում հունվարի 28-ին տեղի ունեցած «Ընտրողների գործադուլ» ակցիայի ընթացքում ձերբակալվել է 350 մարդ: Այս մասին գրում է meduza.io-ն՝ վկայակոչելով «ՕԴՖ-Ինֆո» իրավապաշտպան կազմակերպությունը:
Հատկապես մեծ թվով ձերբակալվածներ կան Ուֆայում՝ 66 մարդ, 65 մարդ ձերբակալվել է Վոլգոգրադում, 51 մարդ՝ Չեբոքսարում, 16-ը՝ Մոսկվայում, 19-ը՝ Սանկտ-Պետերբուրգում: Գրեթե բոլոր ձերբակալվածներն ազատ են արձակվել:
Ուշագրավ է, որ Մոսկվայում և Սանկտ Պետերբուրգում զանգվածային ձերբակալություններ չեն եղել, չնայած որ ակցիան համաձայնեցված չէր քաղաքային իշխանությունների հետ:
Ակցիան կազմակերպվել էր ընդդիմադիր քաղաքական գործիչ Ալեկսեյ Նավալնիի կողմից, որին ավելի վաղ ԿԸՀ-ն հրաժարվել էր գրանցել որպես նախագահի թեկնածու:
Ինքը՝ Նավալնին, նույնպես բերման է ենթարկվել Մոսկվայում՝ փողոց դուրս գալուց գրեթե անմիջապես հետո, ավելի ուշ՝ նրան ազատ են արձակել առանց արձանագրություն կազմելու:
Իր հերթին նախագահի թեկնածու Քսենյա Սոբչակը միայնակ պիկետ է անցկացրել Գրոզնիում՝ պահանջելով ազատ արձակել «Մեմորիալ»-ի չեչենական ստորաբաժանման ղեկավար Օյուբ Տիտիևին: Պիկետը տեղի է ունեցել խոսքի ազատության համար զոհված լրագրողների հուշարձանի մոտ: Տիտիևը ձերբակալվել է Չեչնիայում՝ թմրանյութ պահելու կասկածանքով: Դատարանի որոշմամբ նա կալանավորվել է:
Պատրաստեց՝ Վիկտորյա ԱՆԴՐԵԱՍՅԱՆԸ
