«Մեր բանակը նաեւ տարածաշրջանային կայունության կարեւոր բաղադրիչ է: Ծանր փորձություններ տեսած ազգի համար սեփական բանակի գոյությունն ունի առանձնահատուկ ընկալում»,-հայտարարեց Հայոց բանակի 26-ամյակի առթիվ այսօր «Եռաբլուր» զինվորական պանթեոն այցելած ՀՀ նախագան Սերժ Սարգսյանը: «Մեր բանակը համաժողովրդական է եւ ստեղծման օրից վայելում է ժողովրդի վստահությունը: Ապագայում եւս ՀՀ-ն եւ իր ժողովուրդը փայփայելու են իր բանակը»,-համոզմունք հայտնեց նա:
Նախագահի խոսքով՝ Ադրբեջանի սանձազերծած պատերազմի պարտադրանքով եւ Արցախյան ազատամարտի բերումով՝ պետականության շենքը սկսվել է կառուցվել հենց ինքնապաշտպանությունից. «Բանակը դարձավ նորանկախ հայկական պետականության առանցքը: Մեր ազատամարտիկներ, իսկ հետագայում՝ զինվորներն ու սպաները, անցան փառահեղ մարտական ճանապարհ»:
Սերժ Սարգսյանը փաստեց՝ այսօր որակապես այլ բանակ ունենք՝ զինված ամենաարդիական զինատեսակներով եւ հագեցած ժամանակակից սարքավորումներով. «Շարունակելու ենք հետեւողականորեն բարձրացնել բանակի մարտունակությունը: Զինված ուժերի արդիականացման յոթամյա ծրագիրը կյանքի է կոչվելու ժամանակացույցին համապատասխան: Ես անձամբ ջանք չեմ խնայելու, որ մեր բանակը դառնա ավելի ուժեղ եւ արդիական»:
Լուիզա ՍՈՒՔԻԱՍՅԱՆ
