Ինտեգրված սոցիալական ծառայությունների համակարգի ներդրումից հետո առաջիկայում քաղաքացին մեկ ընդունարանում է սպասարկվելու: Այս մասին այսօր նշյալ համակարգի ներդրմանը նվիրված համաժողովում լրագրողների հետ զրույցում ասաց ՀՀ աշխատանքի և սոցիալական հարցերի նախարար Արտեմ Ասատրյանը:
«Որեւէ հարցով գալով ընդունարան՝ քաղաքացու դիմումը պետք է ընդունվի բացառապես ընդունարանում, և սոցիալական աշխատողները իրենց գործառույթը կիրականացնեն: Այսինքն՝ հստակ տարանջատվում է սոցիալական աշխատանքը վարչարարությունից: Այս կերպ առաջին հերթին կնվազեցվեն կոռուպցիոն ռիսկերը»,-վստահեցրեց Արտեմ Ասատրյանը:
Նա հայտնեց, որ առաջիկա երկու տարում ինտեգրված սոցիալական ծառայությունների համակարգը կգործի լիարժեք: «Արդեն իսկ 22 կենտրոններում կան ձևավորված միասնական ընդունարաններ, իսկ հետագայում թիվը կդառնա 50-55»,-տեղեկացրեց նախարարը:
Լուիզա ՍՈՒՔԻԱՍՅԱՆ
