«Մեր երկիրը հստակ քայլեր է անում սոցիալական պետության կերտման ուղղությամբ: Սոցիալական ռազմավարության կենտրոնում մարդն է, յուրաքանչյուր բարեփոխման թիրախն էլ քաղաքացին է: Սա նշանակում է, որ կատարվող քայլերը պետք է լինեն կշռադատված, հատկապես, երբ խոսքը վերաբերում է զգայուն՝ սոցիալական ոլորտին»,-«Ինտեգրված սոցիալական ծառայությունների համակարգի ներդրում. ձեռքբերումներ և խնդիրներ» խորագրով համաժողովում այսօր հայտարարեց ՀՀ Ազգային ժողովի նախագահ Արա Բաբլոյանը:
Նրա խոսքով՝ ինտեգրված սոցիալական ծառայությունների համակարգի նպատակն է՝ բացահայտել ընտանիքների կարիքներն ու խնդիրները՝ ներդնելով համարժեք սոցիալական ծանրություններ. «Պետք է օգնել այն քաղաքացուն, որն իսկապես կարիքավոր է: Այդ համակարգի ներդրման արդյունքը լինելու է սոցիալական արդարությունը: Այն ավելի կբարձրացնի սոցիալական պաշտպանվածության մակարդակը»:
ՀՀ աշխատանքի և սոցիալական հարցերի նախարար Արտեմ Ասատրյանն էլ իր հերթին նշեց՝ ինտեգրված սոցիալական ծառայությունների համակարգի ներդրումը քաղաքացու կյանքի որակը բարձրացնելուն է ուղղված. «Ծառայությունների կենտրոնում սոցիալական աշխատողն է: Այն ծառայությունները, որոնք ենթադրում են քաղաքացու եւ ընտանիքի հետ աշխատանք, պետք է գործեն համակարգված»:
Նախարարը տեղեկացրեց, որ առաջիկայում կամբողջացնի էլեկտրոնային սոցիալական ծառայությունների տեղեկատվական համակարգը. «Ցանկացած պահի նույն տեղեկատվությունը հասանելի կլինի տաբեր մարմինների համար: Սա կարեւոր է, որ սոցիալական պաշտպանության ծրագրերի հասցեականությունը բարելավվի»:
Հիշեցնենք, որ ինտեգրված սոցիալական ծառայությունների ծրագիրը մեկնարկել է 2012 թվականից:
Լուիզա ՍՈՒՔԻԱՍՅԱՆ
