Անվանի ճարտարապետ, ՀՀ եւ ԽՍՀՄ պետական մրցանակի դափնեկիր, Գյումրու օդանավակայանի, Երեւանի «Հրազդան» մարզադաշտի, Մարզահամերգային համալիրի, սեյսմիկ կայանի եւ այլ շենքերի համահեղինակ Գուրգեն Մուշեղյանը ցավ է ապրում Հայաստանում հուշարձանների ու հայտնի շինությունների աղավաղման համար: «Առավոտի» հետ զրույցում կարծիք հայտնելով Երեւանի ամենամոդեռնիստական կառույցներից «Ռոսիա» կինոթատրոնի դիմագծի աղավաղման վերաբերյալ՝ ճարտարապետն ասաց. «Ոչ միայն հեղինակին՝ Հրաչ Պողոսյանին, չեն հարցրել, այլեւ կասկածի տակ է՝ այնտեղ մոզաիկա պե՞տք է, թե՞ ոչ:
Դա քաղաքի ձեւավորում չէ, ինքը ծավալն արդեն իր տեղն ունի, ո՞վ է որոշել, որ այդտեղ պետք է մոզաիկա լինի, չէ՞ որ մոզաիկան բովանդակություն էլ է ունենում… Նման վերափոխումներով քաղաքն աղավաղում են»: Նա փաստեց, որ «Ռոսիա» կինոթատրոնի հեղինակներից ՀՀ վաստակավոր ճարտարապետ Հրաչ Պողոսյանն արդեն արձագանքել է խնդրին Ֆեյսբուքի իր էջում, գրելով, որ ժամանակին «Ռոսիան» նախագծելիս նպատակ էր դրված ցեխոտ շուկայի տեղում կառուցել մշակութային կենտրոն, իսկ այժմ կյանքը նորից վերադարձրել է շուկան:
ԳՈՀԱՐ ՀԱԿՈԲՅԱՆ
«Առավոտ»
26.01.2018
