Հայաստանի աթլետիկայի ֆեդերացիայի գլխավոր քարտուղար Նարինե Շահբազյանը մրցաշրջան-2017-ը մարզիկների ելույթների եւ ազգային ֆեդերացիայի աշխատանքների տեսանկյունից հայկական աթլետիկայի համար հաջողված է համարում:
«2017 թվականին Քենիայում կայացած պատանիների (մինչեւ 17 տարեկան) աշխարհի առաջնությունում հայկական աթլետիկայի պատմության մեջ առաջին անգամ մեր երկու մարզիկներն անցել են եզրափակիչ: Գայանե Չիլոյանը եզրափակիչ մրցավազքում զբաղեցրել է ութերորդ տեղը, իսկ Յանա Աբրահամյանը 12-րդն է եղել հեռացատկում: Եվրոպայի թիմային առաջնության երրորդ խմբում Հայաստանի հավաքականը նվաճել է երկու ոսկե, երկու արծաթե եւ ինը բրոնզե մեդալ: Անցած տարի մենք անցկացրինք նախատեսված բոլոր միջոցառումները, այդ թվում՝ Ռոբերտ Էմմիյանի գավաթի մրցաշարը, որը նվիրված էր նրա՝ Եվրոպայի ռեկորդի 30-ամյակին:
Նոր մրցաշրջանը փաստացի մեզ համար սկսվել է դեկտեմբերի երկրորդ կեսից, երբ Հայաստանի հավաքականն ուսումնամարզական հավաք անցկացրեց Օլիմպավանում, որտեղ շատ լավ պայմաններ են ստեղծված: Ցավոք, մենք դեռ չունենք համապատասխան վազքուղիներ, այդ պատճառով շեշտը դրվեց ֆիզիկական պատրաստվածության վրա:
Հունվարի 21-ին հեռացատկորդ Լեւոն Աղասյանը կմասնակցի Ղազախստանում կայանալիք միջազգային մրցաշարին: Անցած տարի այնտեղ նա հաղթող էր դարձել, հույս ունենք՝ այս տարի եւս այդպես կլինի: Հունվարի 20-ից 21-ը Երեւանում հանրապետության բաց մրցաշար կանցկացնենք, որի արդյունքներով կձեւավորվի թիմ՝ Ստամբուլում ուսումնամարզական հավաքին մասնակցելու համար (փետրվարի 6-ից 16-ը): Այնուհետեւ, մեր առաջատար աթլետները Թուրքիայում կմասնակցեն Բալկանյան երկրների ձմեռային առաջնությանը եւ Թուրքիայի ֆեդերացիայի գավաթին: Կաշխատենք վարկանիշ նվաճել մրցաշրջանի առաջին կարեւոր մեկնարկին՝ աշխարհի ձմեռային առաջնությանը մասնակցելու համար, որը կմեկնարկի Անգլիայի Բիրմինգհեմ քաղաքում մարտի 1-ին: Եթե չստացվի, մեկ մասնակցի «սպիտակ քարտ» կստանանք եւ ինքներս կընտրենք ուժեղագույն մարզիկին:
Ֆեդերացիայի օրացուցային պլանով նախատեսված է 2018 թվականին 40 միջոցառում անցկացնել, ինչպես հանրապետական, այնպես էլ միջազգային: Մայիսին տեղի կունենա Հայաստանի առաջնությունը, որտեղ կընտրենք այն աթլետներին, որոնք կմասնակցեն Եվրոպայի փոքր երկրների (հունիս, Լիխտենշտեյն) երկրորդ առաջնությանը: Լիխտենշտեյնից առաջ Հայաստանի ազգային հավաքականը Սոչիում ուսումնամարզական հավաք կանցկացնի: Պատանիների հավաքականը հուլիսին Հունգարիայի Գյոռ քաղաքում հանդես կգա Եվրոպայի առաջնությունում: Նույն ամսին Ֆինլանդիայի Տամպերե քաղաքում կանցկացվի մինչեւ 20 տարեկանների աշխարհի առաջնությունը: Իսկ օգոստոսին Բեռլինում մեզ սպասվում է մեծահասակների Եվրոպայի առաջնությունը»,-ասում է Նարինե Շահբազյանը:
ԱՇՈՏ ՀԱԿՈԲՅԱՆ
«Առավոտ»
26.01.2018
