Այսօր ԱԺ –ում գենետիկորեն ձեւափոխված օրգանիզմների, կամ այլ կերպ ասած՝ ԳՄՕ-ների մասին տարածքային կառավարման, տեղական ինքնակառավարման, գյուղատնտեսության եւ բնապահպանական հարցերի հանձնաժողովը խորհրդարանական լսումներ էր կազմակերպել:
«Հանուն կայուն մարդկային զարգացման» ՀԿ նախագահ Կարինե Դանիելյանը գյուղատնտեսության փոխնախարար Աշոտ Հարությունյանին հարցրեց. «Մի՞թե չեք տեսնում տարբերությունը բնական սելեկցիայի եւ այն, ինչ իրականացնում է գիտությունը՝ գենային ինժեներիայի պարագայում: Դա նա չէ, որ այն ինչ բնության մեջ կա, մենք ուղղակի արագացնում ենք, մենք այն, ինչ բնության մեջ կա անտեսում ենք եւ օգտագործում ենք վիրուսների եւ բակտերիաների հնարավորությունը՝ խաբել օրգանիզմին եւ միջտեսակային փոփոխություններ անել: Մենք հիվանդությունների հնարավորությունն ենք օգտագործում եւ հսկայական է տարբերությունը, այդպես չե՞ք կարծում»:
Փոխնախարարը պատասխանեց, որ դա պետք է մասնագետները ահագին ուսումնասիրեն, պետք է լինես սննդաբան, կենսաբան, վիրուսաբան, որ կարողանաս հարցը համակողմանի ուսումնասիրել ու հասկանալ՝ ավելի շատ դրակա՞նն է շատ, թե՞ բացասականը. «Տեսեք, կա դեղին բրինձ եւ սպիտակ բրինձ: Իմ իմացած տեղեկատվությամբ, կարող է գազարի գենի հետ գնացել է, գունավորում է ստացել ու մարդ կա՝ գազարից ալերգիկ հիվանդություն ունի: Երբ գազարը գենային ինժեներիայի արդյունքում խաչվել է, գունավոր բրինձ է ստացվել, միշտ չէ, որ մարդու առողջության համար խիստ վնասակար է, ուղղակի պետք է նախազգուշացվի»:
Հանձնաժողովի նախագահ Վարդեւան Գրիգորյանը հարցրեց՝ դա միջազգային կառույցների կողմից պարտադրա՞նք է, թե՞ ոչ, որ մենք ընդունենք օրենք ԳՄՕ-ների հետ կապված՝ փոխնախարարը պատասխանեց, որ օրենսդրական բաց կա երկրում, բայց Հայաստանի իրավունքն է, կուզի կներկրի, կուզի չի ներկրի, մեզ չեն պարտադրում:
Նա նաեւ հարցրեց՝ ներկրվող սննդամթերքը ստուգելու համար լաբորատորիա կար, հիմա՞ էլ կա, թե՞ մեր սպառողը մնացել է միայն պիտակների հույսին: Փոխնախարարը վստահեցրեց, որ կա երկու լաբորատորիա. «Անհրաժեշտության դեպքում ողջամիտ ժամկետում կուսումնասիրեն, կտան պատասխանը»:
Հռիփսիմե ՋԵԲԵՋՅԱՆ
