ՀՀ Բարձրագույն որակավորման հանձնաժողովը հրապարակել է ԲՈՀ-ում չհաստատված կամ մասնագիտական խորհուրդներ կրկնական քննարկման վերադարձված աշխատանքների ցուցակը`2018թ. հունվարի 22-ի դրությամբ: «Խոտանվածների» ցուցակում ընդամենը երկու աշխատանք է` Կենսաբանություն -023 – ՀՀ ԳԱԱ (1 դոկտորական) եւ Տեխնիկական -030 – ՃՇՀԱՀ:
Նշենք, որ ըստ ԲՈՀ-ի կայքում զետեղված տեղեկատվության 2017 թ. գիտության դոկտորի և գիտության թեկնածուի գիտական աստիճանի վկայագիր ստացածների թիվը 394 է, որից 41-ը` գիտությունների դոկտոր է դարձել, իսկ մնացած 353-ը գիտությունների թեկնածու:
Անցյալ տարի, ամենաշատ ատենախոսությունները պաշտպանվել են տնտեսագիտության ոլորտում. 75 հոգի դարձել են գիտությունների թեկնածու, իսկ 1-ը` դոկտոր, երկրորդ տեղում տեխնիկական ոլորտն է` 49 թեկնածու եւ 2 դոկտոր, երրորդ տեղում` բժշկությունն է` համապատասխանաբար 28 եւ 7 ցուցանիշով: Երկրաբանության բնագավառում անցյալ տարի ընդամենը 1 ատենախոսություն է պաշտպանվել, այն էլ թեկնածուական:
Պաշտպանությունների առումով «ժլատ» են աշխարհագրությունը` 2, դեղագործությունը` 3, փիլիսոփայությունը`3, սոցիոլոգիան` 3 եւ անասնաբուժությունը` 3:
2017-ին գիտությունների դոկտորներ չեն եղել հետեւյալ բնագավառներում` երկրաբանություն, գյուղատնտեսություն, ճարտարապետություն եւ սոցիոլոգիա: 2017 թ ամենամեծ թվով դոկտորներ` 8 գիտնական, տվել է բանասիրության բնագավառը, նրանից հետո 7 դոկտորով բժշկությունն է, իսկ երրորդ հորիզոնականում` 4 գիտությունների դոկտորով ֆիզիկամաթեմատիկական բնագավառն է:
Գոհար ՀԱԿՈԲՅԱՆ
