Երեւանում հունվարի 12-ին լույս աշխարհ եկած եռյակը շարունակում է գտնվել վերարտադրողական առողջության, պերինատոլոգիայի, մանկաբարձության եւ գինեկոլոգիայի հանրապետական ինստիտուտում («Հանրապետական ծննդատուն»):
Հաստատության տնօրեն Ռազմիկ Աբրահամյանը, պատասխանելով մեր հարցին, ասաց, որ երեխաների վիճակը գնահատվում է բավարար: Նորածիններին դուրս գրելու թեկուզ մոտավոր ժամկետ առայժմ չի նշվում: Նրանք ծնվել են շատ փոքր քաշով եւ պետք է մի քիչ մեծանան:
«Մինչեւ երեխաները լավ չլինեն, դուրս գրելու որոշում չի կարող ընդունվել: Եթե ամեն ինչ լավ լինի, նրանք դուրս կգրվեն 1 կգ 800 գրամ կշռելու դեպքում»,- մանրամասնեց Ռազմիկ Աբրահամյանը: Իսկ հարցին, թե նորածինների կյանքին վտանգ սպառնո՞ւմ է, նա այսպես պատասխանեց. «Ամեն րոպե բոլորիս կյանքին վտանգ սպառնում է»:
Փոքրիկների ընտանիքը բնակվում է Արագածոտնի մարզի Թաթուլ համայնքում: Նրանք երիտասարդ ծնողների՝ 25-ամյա Կամոյի եւ 20-ամյա Հռիփսիմեի առաջին երեխաներն են:
Հոդվածն ամբողջությամբ կարդացեք «Հայկական ժամանակ» օրաթերթի այսօրվա համարում
