«Ժիրայր Սեֆիլյանի եւ մյուսների գործով» դատական նիստում այսօր շարունակվեց գործում առկա փաստաթղթերի հրապարակումը, ասել է թե՝ հետազոտումը: Ժիրայր Սեֆիլյանի շահերի պաշտպան, փաստաբան Արայիկ Պապիկյանը դատավոր Տաթեւիկ Գրիգորյանին ասաց՝ քանի որ հրապարակելու են Սեֆիլյանին առնչվող փաստաթղթեր, անհրաժեշտ է նրա ներկայությունը:
Հիշեցնենք, որ նախորդ նիստում Սեֆիլյանը հերթական անգամ խախտել էր նիստի կարգը եւ որոշակի ժամանակով հեռացվել նիստերի դահլիճից:
Պաշտպանի այս միջնորդության դեմ առարկեցին մեղադրող-դատախազները: Հակոբ Ենոքյանը նշեց, որ Սեֆիլյանը միտումնավոր տապալել է նիստը, ուստի նրա հանդեպ կիրառված սանկցիան իրավաչափ է: Դատավոր Տաթեւիկ Գրիգորյանը մերժեց Սեֆիլյանին նիստերի դահլիճ վերադարձնելու միջնորդությունը, ինչից հետո Արայիկ Պապիկյանն ընթերցեց նշյալ փաստաթղթերը, մասնավորապես՝ ԱԱԾ կողմից Սեֆիլյանի հեռախոսահամարների եւ էլեկտրոնային փոստի նամակագրության վերահսկողություն իրականացնելու վերաբերյալ որոշակի տվյալներ:
Ըստ պաշտպանի՝ ԱԱԾ-ն Սեֆիլյանի հանդեպ հետապնդում է իրականացրել օրենքի խախտումներով: «Օրենքով՝ ՕՀԳ (օպերատիվ հետախուզական գործողություն) իրականացնելու համար գաղտնալսումների առավելագույն ժամկետը 12 ամիս է, մինչդեռ ԱԱԾ-ն 2014թ. սկսած է գաղտնալսել Սեֆիլյանին, այսինքն՝ խախտում է եղել: Բացի այդ, դատարանից գաղտնալսումներ կատարելու թույլտվությունը ստանալու համար ԱԱԾ-ն մատնանշել է, թե օպերատիվ տեղեկությունների համաձայն՝ Ժիրայր Սեֆիլյանը կազմակերպում է հավաքներ եւ քննարկումներ, որոնց ժամանակ նախապատրաստում է գործողություններ՝ տիրանալու համար նախագահի եւ կառավարության լիազորություններին: Մինչդեռ 2015թ. փետրվարին ԱԱԾ-ից գործի նյութերն ուղարկվել են գլխավոր դատախազ Կոստանյանին, որն էլ դրանք ուղարկել է քննչական կոմիտեին, որտեղ որոշվել է զանգվածային անկարգություններ կազմակերպելու առթիվ հարուցել քրեական գործ եւ կատարել նախաքննություն: Նշանակում է, որ խաբել են դատարանին եւ փոխել հոդվածը»,-նման հայտարարությամբ հանդես եկավ Արայիկ Պապիկյանը:
Նա համոզմունք հայտնեց, որ Ժիրայր Սեֆիլյանը քաղաքական հայացքների համար է հաշվեհարդարի ենթարկվում. «ԱԱԾ-ի համար ընդդիմադիր գործչին չեզոքացնելու համար օրենք չի գործում: Նա քրեական հետապնդման է ենթարկվում, որովհետեւ պետք է մեկուսացվեր, ու կարեւոր չէ, թե ինչ կերպ»:
Հիշեցնենք, որ «Հիմնադիր խորհրդարան» ընդդիմադիր շարժման առաջնորդ, Շուշիի առանձնակի գումարտակի հրամանատար Ժիրայր Սեֆիլյանը մեղադրվում է ապօրինի զենք-զինամթերք պահելու, հանցավոր նպատակներով խումբ (ամբաստանյալներ՝ Ներսես Պողոսյան, Սասունիկ Կիրակոսյան, Գալուստ Գրիգորյան, Հովհաննես Պետրոսյան, Գեւորգ Սաֆարյան, Հրայր Թոփչյան) ձեւավորելու, զորամաս եւ Երեւանի հեռուստաաշտարակը զավթելու փորձի մեջ:
Լուիզա ՍՈՒՔԻԱՍՅԱՆ
