Կաշառք վերցնելու մեջ մեղադրվող՝ Շենգավիթ վարչական շրջանի ընդհանուր իրավասության դատարանի արդեն նախկին դատավոր Իշխան Բարսեղյանի գործով դատական նիստի ընդմիջմանը, ինչպես տեղեկացրել էինք, նրա համար շտապօգնություն կանչվեց:
Բուժզննությունից հետո շտապօգնության բժիշկ Տիգրան Խաչատրյանն արձանագրեց՝ Բարսեղյանի վիճակը բավարար է: «Նրա մոտ սուր սրտային խնդիր չի հայտնաբերվել, բայց հետազոտությունների անհրաժեշտություն կա: «Իշեմիայի» կասկածելի նշաններ կան: Սրտաբանի պարբերական հսկողություն եմ առաջարկում»,-դատավոր Վաչե Մարգարյանին ասաց բժիշկը: Նա, սակայն, չկարողացավ պատասխանել հարցին՝ Բարսեղյանն ի վիճակի՞ է շարունակել նիստի մասնակցել:
Դատավորն արձանագրեց, որ ըստ բժշկի՝ այս պահին նրա մոտ խնդիրներ չկան, մինչդեռ ինքը Իշխան Բարսեղյանն առարկեց՝ ասելով, որ վատ է զգում:
Նրան զայրացրեց դատավորի այն դիտարկումը, թե Բարսեղյանը մեկ տարուց ավելի՝ կալանքի տակ է, գործի քննությունը հետաձգելն էլ անընդունելի է:
«Շյոտչիկ ա հա՞ պտտվում…դուք չեք կալանքի տակ, այլ ես, ասում եմ՝ լավ չեմ…Կասկածո՞ւմ եք, որ լավ չեմ: Եթե չեք հավատում, ձեր խնդիրն է»,-բարձր ձայնով ասաց նախկին դատավորը:
Գործը քննող դատավոր Վաչե Մարգարյանն էլ ասաց, որ կասկածի հիմքեր դատարանը չունի:
Նիստը հետաձգվեց մեկ շաբաթով:
Լուիզա ՍՈՒՔԻԱՍՅԱՆ
