Ադրբեջանցի ակտիվիստին դուրս են հրավիրել ԵԽԽՎ նիստերի դահլիճից

Երեկ ՀՀ նախագահ Սերժ Սարգսյանի՝ Եվրոպայի խորհրդի խորհրդարանական վեհաժողովի (ԵԽԽՎ) լիագումար նիստի ընթացքում հնչած ելույթի ընթացքում ադրբեջանցի ակտիվիստ Ահմեդ Շահիդովին ԵԽԽՎ անվտանգության աշխատակիցները թույլ չեն տվել մնալ ԵԽԽՎ դահլիճում:

Aravot.am-ի հետ զրույցում ԵԽԽՎ անվտանգության աշխատակիցը, որն այդ պահին հսկողություն էր սահմանում ԵԽԽՎ նիստերի դահլիճի վերին հատվածում գտնվող տարածքում, պատմեց. «Խնդրեցի այդ անձին դուրս գալ դահլիճից, քանի որ նա ակնհայտ քարոզչություն էր անում՝ բարձրացրել էր ինչ-որ անձանց նկարներ»:

Հետաքրքրվեցինք՝ որևէ միջադեպ եղե՞լ է, անվտանգության աշխատակիցը պատասխանեց՝ այդ ամենը տևել է մեկ-երկու րոպե, որևէ մեկը ձայնը չի բարձրացրել, պարզապես իրենք տեսել են նկարները և մոտեցել այդ անձին ու դուրս հրավիրել:

Զրուցեցինք ԵԽԽՎ-ում հայկական պատվիրակության անդամների հետ: Հետաքրքրվեցինք՝ որևէ վեճ նկատե՞լ են, նրանք ասացին, որ նման բան չեն նկատել:

Մեր տեղեկություններով՝ Ահմեդ Շահիդովը ԵԽԽՎ նիստերի դահլիճի վերին հատվածում նստել էր՝ Արցախում ադրբեջանցի դիվերսանտ Դիլհամ Ասկերովի և Շահբազ Գուլիևի նկարները բարձրացրած:

Տաթև ՀԱՐՈՒԹՅՈՒՆՅԱՆ

Ստրասբուրգ