ՀՀ ԱԺ պատգամավոր Վարդան Բոստանջյանն այսօր լրագրողների հետ հանդիպման ժամանակ խոսեց նաեւ թե ԵՄ եւ ԵԱՏՄ ճամբարների հետ միաժամանակ համագործակցելու պայմաններում Հայաստանի զարգացմանը խանգարող պատճառների մասին:
«Հետաքրքիրն այն է, որ եւ ԵՄ-ի եւ ԵԱՏՄ-ի շրջանակներում գործելու կտրվածքով ոչ արեւմտյան, ոչ արեւելյան կողմերը, իմ խորին համոզմամբ, մեր զարգացմանը ընդհանրապես չեն արգելակում: Մենք հակված ենք մեզ մոտ բացասական երեւույթները որակել որպես մեկի կամ մյուսի արդյունք: Հավատացնում եմ եւ բոլորը թող իմանան, որ այդպես չէ: Այն պոտենցիալ հնարավորությունները, որ ունի մեր երկիրը, իսկ դրանք մեծ չեն, բայց փոքր էլ չեն, արդյունավետ չեն օգտագործվում: Ամեն մի երկրի ներուժն ընդերքն է: Մենք այն օգտագործո՞ւմ ենք ինչպես պետք է: Օտարներն են գնահատել, որ հայ մարդն ունի պոտենցիալ մեծ հնարավորություն: Բայց մենք չենք կարողանում այդ հնարավորությունները ներդնել մեր երկրի զարգացման համար: Այսինքն, համակարգի ոչ արդյունավետությունը ուղղակիորեն պայմանավորված է այն հանգամանքով, որ գոնե մեր ունեցած ռեսուրսները լավ չենք օգտագործում: Էլ չեմ խոսում ազատ մրցակցության բացակայության, կոռուպցիոն ռիսկերի ահավորության, բազում այլ սուբյեկտիվ հանգամանքների մասին, որոնք ըստ էության կառավարման համակարգը պարզապես պետք է բացառի, կամ առնվազն մեղմի», – ասաց պատգամավորը:
Աշոտ ՀԱԿՈԲՅԱՆ
