Ազգային օպերային թատրոնի որոշ մեներգիչներ, համաձայն իրենց հյուրախաղային գրաֆիկի, նոր տարին դիմավորեցին «դրսում» կամ էլ ամանորյա տոներից հետո անմիջապես մեկնել են արտասահման: Օրինակ, տենոր Լիպարիտ Ավետիսյանը Գերմանիայի թատրոններում էր: Դեկտեմբերի 29, 31-ին «Դոյչե օպերայում» հանդես է եկել Պուչինիի «Բոհեմում»՝ Ռուդոլֆի դերերգով, Քյոլնի օպերային թատրոնում էլ դեկտեմբերի 17, 26-ին եւ հունվարի 4, 7-ին ներկայացել է որպես Դուքս՝ Վերդիի «Ռիգոլետո» ներկայացման մեջ, հունվարի 28-ին «Շտատս օպերայում»՝ Վերդիի «Տրավիատայում» կմարմնավորի Ալֆրեդին:
Հայ արվեստագետները Էյլաթում:
Բարիտոն, ՀՀ վաստակավոր արտիստ Գեւորգ Հակոբյանը մինչ Ամանորը բեմ է բարձրացել արտասահմանյան տարբեր թատրոններում, նոր տարին դիմավորել տանը, ապա հունվարի 1-ին թատրոնի գեղարվեստական ղեկավար, ՌԴ վաստակավոր արտիստ Կոնստանտին Օրբելյանի եւ իր կոլեգաների՝ սոպրանոներ Սյուզի Մելքոնյանի, Ջուլիետա Ալեքսանյանի, տենորներ Հովհաննես Այվազյանի ու Արմեն Բադալյանի հետ մեկնել Իսրայել: Էյլաթ քաղաքում ավանդաբար անցկացվող «Կլասսի-Կամերի» փառատոնում, որը երկար տարիներ ղեկավարել է Վալերի Գերգիեւը, հայաստանցի երգիչները մաեստրո Օրբելյանի ղեկավարությամբ, տեղի նվագախմբի ընկերակցությամբ հունվարի 3-ին եւ 5-ին հանդես են եկել հայկական, իտալական ու ռուսական դասական արվեստի ընտիր նմուշներով:
Հակոբյան-իշխան Գրյազնոյ:
«Առավոտը» կապվեց Գեւորգ Հակոբյանի հետ, որը փետրվարի 15, 17-ին Մեծ թատրոնում հրավիրված է կատարելու Կոմս Տոմսկու դերերգը Չայկովսկու «Պիկովայա դամա» օպերայի պրեմիերային: Արվեստագետը նշեց, որ ճանաչված այս օպերան բացարձակ նոր ընթերցում է, որի բեմադրող դիրիժորը Տուգան Սոխիեւն է, ռեժիսորը՝ Ռիմաս Տումինասը: Խնդրեցինք ներկայացնել մինչ Ամանոր երգչի բեմելներն արտասահմանում: Մեր զրուցակիցը նշեց իր մասնակցությամբ իտալական մի քանի նախագծեր, դրանք են՝ Ջորդանոյի «Անդրեա Շենյե» բեմադրությունը, Վերդիի «Նաբուկո» օպերան, Կարակալա փառատոնին մասնակցությունը եւ Պուչինիի «Տոսկան»: Հոկտեմբերին «Շտուտգարդ օպերայում» հանդես է եկել Կոմս Տոմսկու դերերգով «Պիկովայա դամա» օպերայում: Մեծ թատրոնում էլ հանդես է եկել Ռիմսկի-Կորսակովի «Թագավորի հարսնացուն» օպերայում, կատարելով Իշխան Գրյազնոյի դերերգը: Բոլոնիայի օպերային թատրոնում ներկայացել է Սկարպիա՝ Պուչինիի «Տոսկայում»:
Գեւորգ Հակոբյանը՝ Տոմսկու կերպարում:
Բարիտոնի երեք մենեջերները՝ Իտալիայից Անջելո Գաբրիելին, Մեծ Բրիտանիայից Մարկ Հիլդրուն եւ Ավստրիայից Արիանա Հոլենդերը, փաստորեն, լավ են կատարում իրենց առաքելությունը: Կեսկատակ-կեսլուրջ հարցին՝ ձեզ սպասե՞նք հայրենիքում, Գեւորգ Հակոբյանը պատասխանեց. «Մոսկվայում «Պիկովայա դամայի» պրեմիերայից անմիջապես հետո վերադառնում եմ Հայաստան»:
Սկարպիայի կերպարում:
ՍԱՄՎԵԼ ԴԱՆԻԵԼՅԱՆ
Եթէ բէթօնճիները դրսում աշխտում են -Օփերայի երգիչները ինչու ներսում պիտ աշխատին ….