Հրապարակվեց «Լիա» գեղեցկության սրահում սպանվածի կնոջ ցուցմունքը

Չարբախում մեկ տարի առաջ «Լիա» գեղեցկության սրահում տեղի ունեցած սպանության գործով այսօր Շենգավիթ վարչական շրջանի իրավասության դատարանում հրապարակվեց այս գործով տուժողի իրավահաջորդ Մուշեղ Մուշեղյանի կնոջ՝ Նարինե Հովհաննիսյանի նախաքննական ցուցմունքը:

Ըստ վկայի նախաքննական ցուցմունքի՝ դեպքի նախորդ օրը ամուսինն առավոտյան տանից դուրս է եկել՝ հայտնելով, որ ընկերների հետ է լինելու և այդ օրը տուն չի գալու: Սպանվածի կինը հայտնել է, թե տեղյակ չէ՝ ամուսինը թշնամիներ ուներ, թե` ոչ:

Ըստ ցուցմունքի՝ Նարինե Հովհաննիսյանն ասել է, որ չի ճանաչում միջադեպի մասնակիցներից ոչ մեկին: Նարինե Հովհաննիսյանը դատարան չէր ներկայացել եւ դատարանին գրությամբ հայտնել էր, որ չի ցանկանում ներկա լինել դատական նիստերին և ցանկանում է, որ հիմք ընդունեն իր նախաքննական ցուցմունքը:

Այսօրվա դատական նիստին չէին ներկայացել նաև դատակոչված եւս 3 վկա: Դատարանը որոշեց բերման ենթարկել Վիրաբ Գասպարյանին և Դավիթ Հախանումյանին:

Հիշեցնենք, որ Պետրոս Իսրայելյանին մեղադրանք է առաջադրվել, որ Մուշեղ Մուշեղյանին մորթելու, սատկացնելու, մահակներով ոտքերը ջարդելու և այլ ձևերով վերջինիս առողջությանը մի խումբ անձանց հետ ծանր վնաս պատճառելն իրագործելու վերաբերյալ Ալիկ Բանդուրյանի հորդորների հետևանքով նրա մոտ այլ անձանց հետ համատեղ Մուշեղ Մուշեղյանի առողջությանը ծանր վնաս պատճառելու վճռականություն է առաջացել, որից հետո նախնական համաձայնության գալով Գևորգ Ավետիսյանի և քննությամբ չպարզված անձանց հետ` խմբի կազմում, Ալիկ Բանդուրյանի օժանդակությամբ նա իրագործել է Մուշեղ Մուշեղյանի նկատմամբ պլանավորված հանցավոր ոտնձգությունը, սակայն հանդիպելով Մուշեղ Մուշեղյանի զինված դիմադրությանը` վերջինիս կողմից անհրաժեշտ պաշտպանության վիճակում ատրճանակով կրակոցներ արձակելուն, Մուշեղ Մուշեղյանի դիմադրությունը հաղթահարելու և այդ ժամանակ ծագած Մուշեղ Մուշեղյանին սպանելու հանցավոր դիտավորությունն ավարտին հասցնելու նպատակով ապօրինաբար վերջինիս ուղղակի դիտավորությամբ զրկել է կյանքից:

Ալիկ Բանդուրյանին մեղադրանք է առաջադրվել, որ նա 2016թ. նոյեմբերի 13-ին Պետրոս Իսրայելյանին դրդել է այլ անձանց հետ համատեղ Մուշեղ Մուշեղյանի առողջությանը դիտավորությամբ ծանր վնաս պատճառել, այսինքն` հորդորելու, շահագրգռելու եղանակով Պետրոս Իսրայելյանի մոտ Մուշեղ Մուշեղյանի նկատմամբ հանցավոր ոտնձգություն կատարելու վճռականություն է հարուցել, ինչպես նաև նույն օրը հանցավոր խմբին օժանդակել է պլանավորված հանցագործության անխոչընդոտ իրականացմանը` Մուշեղ Մուշեղյանի առողջությանը ծանր վնաս պատճառելու գործընթացը հեշտացնելու, հետևաբար դրա խոչընդոտները վերացնելու եղանակով:

Արփինե ՍԻՄՈՆՅԱՆ