Երեկ կայացած արագ շախմատի Հայաստանի առաջնության մասնակիցները հետաքրքիր պայքար ցույց տվեցին: Չեմպիոնը որոշվեց միայն եզրափակիչ տուրում: Գրոսմայստեր Մանուել Պետրոսյանն, ի վերջո, վաստակեց 6.5 միավոր ու կես միավորով գերազանցեց մրցանակային հաջորդ երկու տեղերը զբաղեցրած Հայկ Մարտիրոսյանին եւ Տիգրան Հարությունյանին:
Այս առաջնությանը, ինչպես նաեւ դասական շախմատի, տոն տվեցին գերազանցապես երիտասարդները, որոնց հետ արդեն Հայաստանի շախմատային ֆեդերացիան պետք է շատ լուրջ աշխատանք տանի՝ ստեղծի լրացուցիչ պայմաններ, կազմի մարզումային համապատասխան ծրագրեր ու գրաֆիկ, նրանց համար ընտրի որակյալ մարզիչներին: Հակառակ դեպքում, ինչպես ցույց են տալիս վերջին տարիները, մեր շախմատային հերթափոխը լավագույն արդյունքներ ցույց է տալիս պատանեկան եւ երիտասարդական տարիքում, համալրում է միջազգային վարպետների եւ գրոսմայստերների շարքերը, դառնում հանրապետության չեմպիոն կամ մրցանակակիր, իսկ դրանից հետո նրանց մարզական բարձրագույն արդյունքների հետագա աճը եւ մուտքը համաշխարհային շախմատային վերնախավ կանգ է առնում: Այդպիսի օրինակները բազմաթիվ են հայկական շախմատում:
Աշոտ ՀԱԿՈԲՅԱՆ
