«Հուսով եմ՝ ՄԻԵԴ-ը կճանաչի խախտումը: Եթե ճանաչեց, ապա ՀՀ-ն պարտավորվելու է քննություն իրականացնել եւ պարզել մեղավորներին: Մինչ օրս ոչ մի ոստիկան պատասխանատվության չի ենթարկվել»,-լրագրողների հետ զրույցում այսօր անդրադառնալով ՄԻԵԴ-ի կողմից դատապարտյալ Հայկ Կյուրեղյանի գանգատը վարույթ ընդունելու փաստին, ասաց փաստաբան Լուսինե Սահակյանը:
Նա հավելեց, որ ՄԻԵԴ-ի կողմից նշյալ գանգատը վարույթ ընդունելը ենթադրում է, որ ՄԻԵԴ-ը վեց ամսում Կյուրեղյանի հետ կատարվածի մասին համապատասխան հարցումներ է ուղարկելու ՀՀ-ին՝ հետագայում որոշում կայացնելու համար:
Հայկ Կյուրեղյանի հայրը՝ Արմենակ Կյուրեղյանն (լուսանկարում) էլ տեղեկացրեց, որ Հայկն առողջական խնդիրներ ունի, որոնք առաջացել էին հացադուլից հետո. «Բոլորին է հայտնի, թե կալանավայրերում ինչ պայմաններ են, որոնք ազդում են մարդու առողջության վրա»: Կյուրեղյանը նաեւ նշեց, որ որդին լավ հոգեվիճակում է, հետեւում է ՀՀ ներքաղաքական զարգացումներին:
Լուիզա ՍՈՒՔԻԱՍՅԱՆ
