Լոռու մարզի 48 փաստաբաններ այսօր նախազգուշական գործադուլի են դուրս եկել: Վերջիններս միանալով գործընկերներին` պահանջում են բացառել «ՀՀ դատական օրենսգիրք» ՀՀ սահմանադրական օրենքի նախագծով սահմանված՝ դատարանի կողմից փաստաբանի նկատմամբ տուգանքի կիրառում նախատեսող իրավակարգավորումը:
-Փաստաբաններից 1200-ից ավելի հայտարարություն էին տարածել մամուլով, իրենց անհամաձայնությունը հայտնելով օրենքի համապատասխան փոփոխությանը, որ առաջին ընթերցումով ընդունվել է: Մենք՝ Լոռու մարզի փաստաբաններով էլ որոշեցինք հաջորդ քայլը նախազգուշական գործադուլ հայտարարենք, ուղղակի հրաժարվենք մեկ օր Լոռու մարզի տարածքում պետական պաշտպանություն կամ ներկայացուցչություն իրականացնելուց,- Aravot.am-ի հետ զրույցում ասաց Փաստաբանների պալատի հյուսիսային ներկայացուցչության ղեկավար, փաստաբան Ռուբեն Հակոբյանը:
Փաստաբանի խոսքով, վաղը կրկին կվերադառնան իրենց բնականոն աշխատանքին: Հետագա քայլերի մասին խոսելն էլ դեռ վաղ է: Ռուբեն Հակոբյանն ասում է, որ շատ ավելի հեշտ է պայքարել պատճառների դեմ, քան հետեւանքների. «Նպատակն այն է, որպեսզի պատկան մարմինները սխալ թույլ չտան: Որպեսզի մենք հետագայում չպայքարենք հետեւանքների վերացման ուղղությամբ, այլ պատճառների դեմ»:
Տաթեւիկ ՂԱԶԱՐՅԱՆ
