Ինչպես տեղեկացրել ենք, դեկտեմբերի 16-ին Գյումրու Անի թաղամասում գտնվող «Վիկտորիա» հարսանյաց սրահից հարսանիքավորների հետ կապ չունեցող մի երիտասարդ օպերատոր Հայկ Հակոբյանի վերարկուի ծոցագրպանից գողացել էր 450 հազար դրամ։ Ու թեև հարսանյաց սրահի տեսախցիկներն արձանագրել էին կատարվածը՝ ոստիկանության «Մուշ» բաժնի աշխատակիցների հետ հեռախոսազրույցում էլ երիտասարդը խոստովանել էր, որ ինքն է կատարել գողությունը, պարտավորվել էր ներկայանալ ոստիկանություն, սակայն չէր ներկայացել, ոստիկանությունն էլ իրեն նեղություն չէր տվել նրան բերման ենթարկելու։ Օպերատորի ասելով, իրեն փոխանցել էին, որ վերջինս փախուստի մեջ է ու հասկացրել էին, որ հույս չունենա գողության բացահայտման։
Aravot.am-ի հրապարակումից ժամեր անց Շիրակի դատախազ Կարեն Գաբրիլյանի հանձնարարականով հետախուզում հայտարարվեց 1983 թվականին ծնված Հովհաննես Էդիկի Սիմոնյանի նկատմամբ, վերջինս անմիջապես հայտնաբերվեց ու հարկադրված եղավ վերադարձնել գողոնը․ օպերատորից գողացված 450 հազար դրամից 400 հազարը վերադարձրել է։
«50 հազար դրամը խոստացել են վերադարձնել վաղը, ես շնորհակալ եմ մարզի դատախազից, նա անմիջապես ձեռնամուխ եղավ գողության բացահայտմանն ու գողոնի վերադարձին, շնորհակալ եմ նաև ավագ քննիչ Գևորգ Թորոյանից։ Նա էլ ակտիվ աշխատեց, հետևողականորեն կատարեց դատախազի հանձնարականը ու արդյունքում ինձանից գողացված գումարը, որը, գիտեք, վարկ էի վերցրել բանկից, վերադարձրեցին», -ասաց Հայկ Հակոբյանը։
Նունե ԱՐԵՎՇԱՏՅԱՆ
