Շառլ Ազնավուրի անվան հրապարակից այսօր մեկնարկեց «Ելք» դաշինքի նախաձեռնած՝ Հարկային օրենսգրքում փոփոխությունների հետեւանքով գրանցված թանկացումների դեմ բողոքի երթը:
Մասնակիցները հրելով դեպի Հանրապետության հրապարակ տարան սովետական «Ջորի»-ն, որը, դաշինքի առաջնորդներից Նիկոլ փաշինյանի խոսքով, խորհրդանշում է ՀՀ տնտեսության հետընթացը:
Քաղաքացիները «Ոչ թանկացումներին» կարգախոսով հասան մինչեւ Հյուսիսային պողոտա, որտեղ էլ ավարտվեց երթը: Նիկոլ Փաշինյանը հայտարարեց՝ իրենց պահանջը մեկն է՝ իշխանություններին պարտադրել փոփոխություններ մտցնել Հարկային օրենսգրքում:
Նիկոլ Փաշինյանն արձանագրեց. «Այսօր «Ելք» դաշինքն ունեցավ իր ստեղծման օրից ի վեր ամենաբազմամարդ եւ էներգետիկ երթը՝ իր պատմության ամենահզոր երթը: Առաջիկայում՝ ինչ-որ մի օր, դաշինքը կիրականացնի նաեւ ՀՀ պատմության ամենաբազմամարդ եւ վճռորոշ երթը»:
Փաշինյանը տեղեկացրեց, որ «Ելք»-ի հաջորդ երթը փետրվարի 5-ին է, իսկ մինչ այդ դաշինքը մշակելու է Հարկային օրենսգրքում փոփոխություններ մտցնելու իր առաջարկների փաթեթը: «Մենք կպահանջենք, որ պատգամավորների ¼-ը ստորագրի այդ խնդրի շուրջ արտահերթ նիստ հրավիրելու մեր պահանջի տակ»,-հավելեց Նիկոլ Փաշինյանը:
Լուիզա ՍՈՒՔԻԱՍՅԱՆ
