«Չեմ կարծում՝ մենք հրատապ պետք է քաղխորհրդի նիստ հրավիրենք այդ որոշումը կայացնելու համար»,-«Առավոտի» հարցին՝ ինչպե՞ս են «Ծառուկյան դաշինքում» վերաբերվում ՀՀ նախագահի պաշտոնի համար ՀՀԿ-ի կողմից առաջադրված՝ Արմեն Սարգսյանի թեկնածությանը, այսպես պատասխանեց «Ծառուկյան» խմբակցության պատգամավոր Նաիրա Զոհրաբյանը:
Նա հավաստիացրեց, թե ժամանակ ունեն. այժմ Գագիկ Ծառուկյանը երկրում չէ, վերադառնալուց հետո, երբ արդեն պարզ լինի, թե անձամբ Արմեն Սարգսյանն ինչ որոշում է կայացրել, իրենք էլ կհայտնեն իրենց դիրքորոշումը:
Մեր այն հիշեցմանը՝ Արմեն Սարգսյանի անունը կապվում է Ամուլսարի խնդրահարույց գործարքի հետ, ուստի դա չի՞ խանգարի, որպեսզի հանրությունը վստահի նրան, տիկին Զոհրաբյանն ի պատասխան վստահեցրեց՝ երբ Արմեն Սարգսյանի հետ հանդիպեն, անպայման այդ հարցերը բարձրացնելու են:
ԵԼՔ խմբակցության պատգամավոր Լենա Նազարյանից հետաքրքրվեցինք՝ թեև իրենց խմբակցությունն առաջադրել էր իր նախագահի թեկնածուին՝ Արտակ Զեյնալյանին, այնուամենայնիվ, ի՞նչ կարծիք ունեն ՀՀԿ-ի առաջադրած թեկնածուի վերաբերյալ: ԵԼՔ խմբակցության պատգամավորը պատասխանեց. «Այժմ օրակարգային այլ հարց ունենք և երբեք այդ հարցը չենք քննարկել: Հիմա զբաղված ենք երթով»:
Հիշեցնենք՝ Արմեն Սարգսյանը Սերժ Սարգսյանին ասել էր, թե իր համար շատ կարևոր է, որ որոշում ընդունելուց առաջ առիթ ունենա հանդիպել քաղաքական տարբեր ուժերին և՛ Ազգային ժողովում, և՛ Ազգային ժողովից դուրս՝ կուսակցություններին: Շատ կուզենար հանդիպել նաև հանրության լայն շրջանակները ներկայացնող գիտական, մտավորական, հասարակական, բարեգործական կազմակերպություններին, գործարար շրջանակներին, աշխատավորական շրջանակներին:
Քաղաքական ուժերի ներկայացուցիչների կարծիքներն ամբողջությամբ՝ վաղվա «Առավոտ»-ում:
Տաթև ՀԱՐՈՒԹՅՈՒՆՅԱՆ
