«Ժիրայր Սեֆիլյանի եւ մյուսների գործով» դատական նիստում այսօր լրացավ ամբաստանյալներից Ժիրայր Սեֆիլյանի եւ Գեւորգ Սաֆարյանի սանկցիայի ժամկետը, եւ նրանք բերվեցին նիստերի դահլիճ: Ժիրայր Սեֆիլյանը, սակայն, կրկին հայտարարեց, որ բոյկոտում է նիստը եւ հեռանում, քանի դեռ իր ընկերների՝ «Սասնա ծռերի» գործով ամբաստանյալներ Արմեն Բիլյանի եւ Սմբատ Բարսեղյանի՝ «Նուբարաշեն» ՔԿՀ-ից «Արմավիր» ՔԿՀ տեղափոխվելու պահանջը չի կատարվել:
Դատավոր Տաթեւիկ Գրիգորյանը Սեֆիլյանին չթույլատրեց հեռանալ, սակայն Սեֆիլյանը լքեց նիստերի դահլիճը: Դատավարական կարգը խախտելու համար դատավորը նրան կրկին՝ մի քանի ժամով հեռացրեց նիստերի դահլիճից:
«Մենք ենք որոշում՝ մասնակցե՞լ դատական նիստին, թե՞ ոչ: Դա մեր իրավունքն է»,-իր հերթին հայտարարեց ամբաստանյալներից Գեւորգ Սաֆարյանը եւ ասաց, որ եւս միանում է Սեֆիլյանի բոյկոտին:
Հաշվի առնելով, որ Սաֆարյանն առանց թույլտվության լքեց նիստերի դահլիճը, դատավոր Տաթեւիկ Գրիգորյանը նրան եւս սանկցիայի արժանացրեց՝ մի քանի ժամով հեռացնելով նիստերի դահլիճից:
Հիշեցնենք, որ «Հիմնադիր խորհրդարան» ընդդիմադիր շարժման առաջնորդ, Շուշիի առանձնակի գումարտակի հրամանատար Ժիրայր Սեֆիլյանը մեղադրվում է ապօրինի զենք-զինամթերք պահելու, հանցավոր նպատակներով խումբ (ամբաստանյալներ՝ Ներսես Պողոսյան, Սասունիկ Կիրակոսյան, Գալուստ Գրիգորյան, Հովհաննես Պետրոսյան, Գեւորգ Սաֆարյան, Հրայր Թոփչյան) ձեւավորելու, զորամաս եւ Երեւանի հեռուստաաշտարակը զավթելու փորձի մեջ:
Լուիզա ՍՈՒՔԻԱՍՅԱՆ
