Սևանյան արևի ջերմությունն արդեն հասցրել են վայելել Սևան համայնքի 3 նախադպրոցական ուսումնական հաստատությունները` թիվ 1 «Բողբոջ», թիվ 3 «Հեքիաթ», թիվ 4 «Գալիք» մանկապարտեզները, Ն. Դագարյանի անվան մարզադպրոցը:
2016թ-ի վերջին և 2017թ-ի ընթացքում այս կազմակերպությունների շենքերի տանիքների տեղադրվել են արևային ջրատաքացուցիչներ: Այդ նախաձեռնությունն իրականացվել է Սևան-Գրենոբլ համագործակցության շրջանակներում` Գրենոբլի քաղաքապետարանի և Գրենոբլ Գոսպել Սինգերս երգչախմբի հովանավորությամբ, որի մասնակիցները 2016թ-ի օգոստոսին հյուրընկալվել էին Սևանում:
Անցյալ տարվա սեպտեմբերին, երբ Սևան համայնքի ղեկավար Սարգիս Մուրադյանն ընդունելության էր հրավիրել Գրենոբլի հայ մշակույթի տան նախագահ Սիրանուշ Խաչատրյանին: Ընդունելության ընթացքում տիկին Սիրանուշը նշեց, որ Գրենոբլի հայ համայնքը պատրաստակամ է աջակցելու սևանցի բարեկամներին:
Ամիսներ անց` արդեն այս տարվա հունվարին, Սևան համայնքի Գագարին գյուղի մանկապարտեզի շենքի տանիքին էլ տեղադրվեց արևային ջրատաքացուցիչ:
Սևան-Գրենոբլ համագործակցության պատասխանատու Նելլի Ստեփանյանի փոխանցմամբ` հերթական ձեռնարկն իրականացվել է Գրենոբլի հայ մշակույթի տան կողմից կատարված հանգանակությամբ, որին հավելվել է նաև այն գումարը, որը որպես պարգևատրում ՀՀ սփյուռքի նախարարությունը նվիրաբերել է Գրենոբլի հայ համայնքին, որը Ֆրանսիայում ճանաչվել է լավագույն համայնք:
Արևային ջրատաքացուցիչի տեղադրումը կատարել են Սևանի արհեստագործական ուսումնարանի սաները, որտեղ 2011թ-ից ներդրվել է այլընտրանքային էներգիայի ծրագիրը:
Վերապատրաստման տեսական մոդուլից հետո տղաներն անցել են պրակտիկ վերապատրաստում` ստանալով ոլորտային անհրաժեշտ գիտելիքներ և որակավորում` որպես արևային էներգետիկներ: Այժմ ուսումնարանում գործում է աշխատանքային 2 բրիգադ: Ի դեպ, բրիգադի ղեկավարի, վարպետի, արդեն իսկ վերապատրաստված արևային էներգետիկների կողքին աշխատանքներին մասնակցում են նաև սկսնակները, որոնք հենց տեղում ստանում են պրակտիկ ուսուցում:
Գագարինի մանկապարտեզի շենքի տանիքին տեղադրված արևային ջրատաքացուցիչի միջոցով ստացված ջուրը պահեստավորվում է 300լ տարողությամբ կուտակիչ բաքում: Համակարգը հնարավորություն է տալիս ստանալու անհրաժեշտ ծավալով տաք ջուր, որը ջրատաքացման ամենաարդյունավետ և շահավետ միջոցն է:
Էներգախնայողության, բնապահպանական այս ձեռնարկն ամանորյա լավագույն նվեր է մանկապարտեզ հաճախող փոքրիկների, մանկապարտեզի աշխատակիցների համար, որի կարիքը մանկապարտեզում միշտ էլ զգացվել է:
Գագարինի մանկապարտեզում շուտով կզգան այս համակարգի առավելությունները, իսկ համայնքի 3 մանկապարտեզներում և մարզադպրոցում արդեն հասցրել են վայելել արևային ջրատաքացուցիչների շնորհիվ ստացվող տաք ջրի առկայությունը:
Այլընտրանքային էներգիայի ծրագրի հաջորդ ձեռնարկը, Սևան-Գրենոբլ համագործակցության պատասխանատու Նելլի Ստեփանյանի տեղեկացմամբ, նախատեսված է իրականացնել Սևանի մարզադպրոցում, որտեղ արդյունավետ լուսավորության ապահովման համար կներդրվի ֆոտովոլտային համակարգ: Այս համակարգի տեղադրման աշխատանքներ արդեն իսկ իրականացվել են Սևան համայնքի 4 տարածքներում:
Հավելենք, որ 2011թ-ից Սևանն ընդգրկվել է վերականգնվող էներգիայի ոլորտում իրականացվող ծրագրում: Ծրագիրն իրականացվում է Օվերն-Ռոն-Ալպ տարածաշրջանի ֆինանսավորմամբ: 2015թ-ից ծրագրի շարունակականությունն ապահովում է Ռոման քաղաքի Հայկական բարեկամական միության շնորհիվ:
Ծրագիրը իրականացվում է այդ նպատակով ստեղծված «Արեգ» հիմնադրամի միջոցով:
Ա. ՂՈՒԿԱՍՅԱՆ
