ԵԱՀԿ Մինսկի խմբի համանախագահներ Իգոր Պոպովը (Ռուսաստան), Ստեֆան Վիսկոնտին (Ֆրանսիա) և Էնդրյու Շոֆերը (ԱՄՆ), ինչպես նաև ԵԱՀԿ գործող նախագահի անձնական ներկայացուցիչ Անջեյ Կասպրշիկը հունվարի 17-ին Կրակովում հանդիպել են Հայաստանի արտգործնախարար Էդվարդ Նալբանդյանի, իսկ հունվարի 18-ին՝ Ադրբեջանի արտգործնախարար Էլմար Մամեդյարովի հետ: Հունվարի 18-ին տեղի է ունեցել նաև եռակողմ հանդիպում: Այս մասին ասվում է համանախագահների տարածած հայտարարության մեջ:
Նախարարները և համանախագահները քննարկել են Լեռնային Ղարաբաղի կարգավորմանը նվիրված նախորդ գագաթնաժողովներում ձեռք բերված պայմանավորվածությունների իրականացման հետագա քայլերը: Նախարարները սկզբունքորեն համաձայնել են համանախագահների վերանայած հայեցակարգային փաստաթղթի հետ՝ կապված ԵԱՀԿ գործող նախագահի անձնական ներկայացուցչի գրասենյակի ընդլայնման հետ՝ համաձայնելով այն ավարտին հասցնել հնարավորինս արագ:
Հանդիպումների ընթացքում կողմերը և համանախագահները կարծիքներ են փոխանակել սեղանին դրված աշխատանքային առաջարկների առանցքային նուրբ հարցերի վերաբերյալ: Համանախագահները նաև կոչ են արել վստահության կառուցման քայլեր ձեռնարկել՝ որպես կարևոր ներդրում բանակցային գործընթացում: Նախարարները և համանախագահներն արձանագրել են հարաբերական հանգիստ շփման գծում, և համանախագահները կոչ են արել կողմերին ամրապնդել այդ դրական միտումը:
Համանախագահները կողմերին հայտնել են, որ շահագրգռված են հետագայում քննարկել հակամարտության հետևանքով տուժած տարածքների՝ 2010թ. գնահատման առաքելությունն ամփոփելու հնարավորությունը:
Համանախագահները պատրաստվում են տարածաշրջան այցելել փետրվարի սկզբին:
Պատրաստեց՝ Վիկտորյա ԱՆԴՐԵԱՍՅԱՆԸ
