Ոմանց կարող է զարմանալի թվալ, որ մեղրը երեխաների գիշերամիզությունը բուժելու առավել արդյունավետ միջոցներից է: Եթե երեխան 3 տարեկանից հետո շարունակում է անկողնում միզել, ապա այն շատ լուրջ անհանգստություն է պատճառում թե երեխային եւ թե ընտանիքի մյուս անդամներին:
Շատերը երկար ժամանակ սպասում են, որ մի օր այդ երեւույթը անցնի: Մասնագետները նշում են, որ անկողնում միզում են դյուրագրգիռ եւ շատ զգայուն երեխաները, որոնք 1 գիշերվա մեջ միզում են 1-2 անգամ: Որոշ երեխաներ անկողնում միզում են հենց պառկելուց առաջին ժամվա ընթացքում, իսկ մյուսների մոտ այն կատարվում է լուսադեմին: Որոշ երեխաներ արթնանում են միզելու պահին կամ անմիջապես դրանից հետո, մյուսները չեն արթնանում՝ մնում են քնած: Երբեմն դա կարող է կատարվել երազ տեսնելու պահին, երեխային կարող է թվալ, թե նա նստած է գիշերանոթին:
Ըստ մասնագետների, այն երեխաները, որոնք հակված են անկողնում միզելուն, մեծ մասամբ շատ նյարդային են: Բացի դրանից, նրանք կարող են կրծել եղունգները, ծծել մատը եւ ամեն կերպ դրսեւորել իրենց գրգռվածությունը: Երբեմն այդպիսի երեխաների մոտ կարող է դիտվել թերզարգացված խոսվածք:
Ժողովրդական բժշկությունը գիշերամիզությունից ազատվելու համար առաջարկում է պրոֆիլակտիկ եւ ակտիվ թերապեւտիկ միջոցներ: Պրոֆիլակտիկ բուժման էությունը կայանում է միզելու հաճախականությունը կարգավորելու մեջ: Այն պետք է սկսել կիրառել մոտավորապես մեկ տարեկանից: Երեխային նստեցնել գիշերանոթին ժամանակի հավասար ընդմիջումներից հետո, օրինակ՝ քնից հետո, ուտելուց հետո եւ այլն: Սկզբում այն կարելի է անել յուրաքանչյուր 3 ժամը մեկ, իսկ հետո ավելի մեծ ընդմիջումներով: Երեխաների մեծ մասը 2 տարեկանում սովորաբար հայտնում է իր միզելու ցանկության մասին:
Ակտիվ թերապիայի նպատակն է գտնել մի այնպիսի միջոց, որն իր մեջ համադրի միանգամից երկու հատկություն. իրեն ձգել եւ պահպանել մարմնի ավելորդ հեղուկները եւ միեւնույն ժամանակ հանգստացնող ներգործություն ունենալ երեխայի օրգանիզմի վրա: Այդպիսի բուժամիջոցը կարելի է երկար ժամանակ օգտագործել եւ չվախենալ, որ այն կվնասի երեխայի օրգանիզմը:
Ժողովրդական բժշկությունը գտնում է, որ մեղրը համապատասխանում է վերը նշված բոլոր պահանջներին: Ունենալով խոնավածուծ հատկություն, մեղրը ընդունակ է դեպի իրեն ձգել եւ խտացնել օդում եղած խոնավությունը: Մեղրի այս հատկությունը կարելի է նկատել մեղրով հացի եւ մեղրով պատրաստված հրուշակեղենի մեջ. դրանք միշտ խոնավություն ունեն եւ երկար ժամանակ պահում են իրենց համային որակը: Ելնելով մեղրի խոնավաձիգ եւ ջուրը խտացնելու հատկություններից, խորհուրդ չի տրվում այն պահել սառնարանում կամ նկուղում: Այն ավելի լավ է պահել չոր, ոչ շատ տաք տեղում, լավ փակված ամանի մեջ:
Շնորհիվ նշված հատկությունների, մեղրը գիշերվա ընթացքում դեպի իրեն է ձգում երեխայի օրգանիզմի «խոնավությունը» եւ այդպիսով կանխում անկողնում միզելը:
Այսպիսով, եթե երեխային անհանգստացնում է գիշերամիզությունը, ապա խորհուրդ է տրվում քնելուց առաջ նրան տալ մեկ թեյի գդալ մեղր: Այն կունենա կրկնակի ներգործություն: Նախ, որպես հանգստացնող միջոց կազդի նյարդային համակարգի վրա, եւ երկրորդ, կթեթեւացնի երիկամների աշխատանքը: Լավ արդյունքներ է տալիս նաեւ խառնուրդի օգտագործումը. 2 բաժին մեղրը խառնել մեկ բաժին հին քացախի հետ եւ տալ երեխային մեկական ճաշի գդալ՝ առավոտյան եւ երեկոյան:
Երբ մեղրի օգտագործումը բերի դրական արդյունքների, կարելի է փորձել, թե կկարողանա՞ ինքը՝ երեխան, առանց մեղրի կարգավորել միզելու հաճախականությունը: Եթե դա հաջողվի երեխային, ապա կարելի է աստիճանաբար նվազեցնել մեղրի ընդունման չափը եւ վերջապես այն լրիվ կրճատել: Իհարկե, չի բացառվում մեղրի պարբերաբար օգտագործումը երեխայի կերակրատեսակների մեջ, քանի որ մեղրը բարերար ազդեցություն է ունենում երեխայի օրգանիզմի եւ աճի վրա:
Պատրաստեց ԱՆՈՒՇ ՄԱԹԵՎՈՍՅԱՆԸ
«Առավոտ»
18.01.2018
