Այսօր ՀՀԿ ԳՄ նիստից հետո ՀՀԿ գործադիր մարմնի անդամ, ՀՀ ԱԺ նախագահի տեղակալ Էդուարդ Շարմազանովը լրագրողներին ասաց, որ ՀՀ 4-րդ նախագահի ՀՀԿ-ի առաջադրած թեկնածուն կարող է հավակնել ընդդիմության մի հատվածի դրական վերաբերմունքին:
Թեեւ Շարմազանովն իրենց թեկնածուի անունը չհրապարակեց, նշելով, որ վաղը երկրի նախագահը հրապարակային այդ անձին կառաջարկի ընդունել ՀՀԿ-ի առաջարկը, սակայն տողատակով հասկացրեց, թե ով է նա:
Հարցին՝ նա ՀՀ նախկին վարչապետ Արմեն Սարգսյա՞նն է, Շարմազանովը ժպտալով ասաց. «Վաղը կիմանաք, նրան շատերդ արդեն գիտեք»:
Շարմազանովի խոսքերով՝ «Մենք հուսով ենք, որ մեր առաջադրած թեկնածուն կարող հավակնել նաեւ ընդդիմության առնվազն մի հատվածի, եթե ոչ ամբողջական հատվածի, դրական վերաբերմունքի: Իսկ նրանք, որոնք միգուցե արդեն որոշել են նախօրոք դեմ քվեարկել, իրենց հոգու խորքում, կարծում եմ, կիմանան, որ մեր թեկնածուն ունի շատ առավելություններ»:
Նշենք, որ մամուլում շրջանառվում է, որ ՀՀ հաջորդ նախագահի ամենահավանական թեկնածուն Արմեն Սարգսյանն է, որը Մեծ Բրիտանիայի եւ Հյուսիսային Իռլանդիայի արտակարգ եւ լիազոր դեսպանն է:
Նելլի ԲԱԲԱՅԱՆ
