Կաշառք պահանջելու եւ ստանալու համար մեղադրվող Շենգավիթի դատավոր Իշխան Բարսեղյանն այսօր հրաժարվեց իր պաշտպաններից մեկից՝ Լիանա Գրիգորյանից, վերջինս չէր ներկայանում դատական նիստերին: Նրա մեկ այլ պաշտպան Վլադիմիր Գրիգորյանը նույնպես տեւական ժամանակ դատարան չի ներկայանում, Իշխան Բարսեղյանը ժամանակ խնդրեց մտածելու՝ հրաժարվո՞ւմ է նրա պաշտպանությունից, թե՞՝ ոչ:
Դատարանը այսօր մերժեց նաեւ Իշխան Բարսեղյանի միջնորդությունը՝ որպես վկա հարցաքննել ԱԱԾ օպերատիվ մի շարք աշխատակիցների: Դատարանը մերժման որոշումը հիմնավորեց նրանով, որ այդ միջնորդությունը էական նշանակություն չէր կարող ունենալ գործի ելքի համար:
Հիշեցնենք, որ Իշխան Բարսեղյանին մեղադրանք է առաջադրվել այն բանի համար, որ նա 1999 թվականից զբաղեցնելով Երևան քաղաքի Շենգավիթ վարչական շրջանի ընդհանուր իրավասության դատարանի դատավորի պաշտոնը, հանդիսանալով դատական իշխանության մարմնի ղեկավար աշխատող և մշտապես իշխանության ներկայացուցչի գործառույթներ իրականացնող պաշտոնատար անձ, Նորիկ Հակոբյանի օգտին իր լիազորությունների շրջանակում գործողություններ կատարելու համար նրանից միջնորդի միջոցով պահանջել և անձամբ ստացել է խոշոր չափերով կաշառք:
Փաստաբան Էլզա Զաքարյանին մեղադրանք է առաջադրվել այն բանի համար, որ նա, կաշառք տվողի և կաշառք ստացողի միջև կաշառքի շուրջ համաձայնության գալուն և կայացած համաձայնության իրականացմանը նպաստելով` կատարել է կաշառքի միջնորդություն:
Արփինե ՍԻՄՈՆՅԱՆ
